Gold Silver Rate: સોના-ચાંદીના ભાવ હજુ કેટલા વધશે? ફરીથી બંને ધાતુમાં ઉછાળો જોવા મળ્યો, જાણો આજનો ભાવ
સોમવાર 13 ઓક્ટોબરના રોજ સોના અને ચાંદીના ભાવમાં તીવ્ર ઉછાળો જોવા મળ્યો. નોંધનીય છે કે, ચાંદીના ભાવ પણ રેકોર્ડ સ્તરે પહોંચ્યા છે.
વૈશ્વિક બજારમાં, હાજર સોનાનો ભાવ લગભગ 2 ટકા વધીને USD 4,084.99 પ્રતિ ઔંસ થયો, જ્યારે હાજર ચાંદી 3 ટકા વધીને USD 51.74 પ્રતિ ઔંસના નવા રેકોર્ડે પહોંચી છે.
રિલાયન્સ સિક્યોરિટીઝના સીનિયર રિસર્ચ એનાલિસ્ટ જીગર ત્રિવેદીએ જણાવ્યું હતું કે, ચાંદીના ભાવમાં વધારો યુએસ-ચીન વેપાર તણાવ, રાજકીય અસ્થિરતા અને યુએસ વ્યાજ દરમાં ઘટાડાની શક્યતાને કારણે થયો છે. વધુમાં યુએસ પ્રમુખ ડોનાલ્ડ ટ્રમ્પે 1 નવેમ્બરથી ચીની ઉત્પાદનો પર વધારાના 100 ટકા ટેરિફ લાદવાની ધમકી આપી હતી.
જો કે, ચીનના રાષ્ટ્રપતિ શી જિનપિંગ સાથેની સંભવિત મુલાકાત પહેલાં વાટાઘાટોની શક્યતા ખુલ્લી છે, જેના કારણે વેપાર સંબંધો સામાન્ય થઈ શકે છે. ત્રિવેદીએ એમ પણ કહ્યું હતું કે, આ મહિને અને ડિસેમ્બરમાં યુએસ ફેડરલ રિઝર્વ દ્વારા 25 બેસિસ પોઈન્ટ રેટ ઘટાડાની અપેક્ષાઓ અને લંડનમાં ચાંદીના મર્યાદિત પુરવઠાએ પણ ચાંદીના ભાવમાં ટેકો આપ્યો હતો.
