IND vs AUS : મેલબોર્ન ટેસ્ટ માટે ટીમ ઈન્ડિયાએ બનાવ્યું ‘ચક્રવ્યુહ’, રોહિત-વિરાટે કરી ખાસ તૈયારીઓ
ટીમ ઈન્ડિયાએ મેલબોર્નમાં રમાનારી બોક્સિંગ ડે ટેસ્ટની તૈયારીઓ શરૂ કરી દીધી છે. આખી ટીમે પ્રેક્ટિસ સેશનમાં ભાગ લીધો હતો. આ દરમિયાન ટોચના 5 બેટ્સમેનોએ બેટિંગની પ્રેક્ટિસ કરી હતી. રોહિત શર્મા અને વિરાટ કોહલી મેલબોર્ન ટેસ્ટ માટે ખાસ તૈયારી કરતા જોવા મળ્યા હતા.
શનિવારે આખી ટીમે આ માટે સખત પરસેવો પાડ્યો હતો. સત્રની શરૂઆત પહેલા સ્લિપ કેચિંગથી થઈ હતી. રિષભ પંતની સાથે વિરાટ કોહલી, શુભમન ગિલ, યશસ્વી જયસ્વાલ અને કેએલ રાહુલે સ્લિપમાં કેચ પકડવાની પ્રેક્ટિસ કરી હતી. આ પછી બધા બેટિંગ કરવા ગયા. જોકે, પંતે ટી દિલીપ સાથે ફિલ્ડિંગ અને કીપિંગની પ્રેક્ટિસ ચાલુ રાખી હતી.
ફિલ્ડિંગ બાદ ટીમના ખેલાડીઓ બેટિંગ પ્રેક્ટિસ માટે ગયા હતા. ટીમના પ્રેક્ટિસ સેશનમાં કેપ્ટન રોહિત શર્માએ સ્પિનર સામે પ્રેક્ટિસ કરી હતી. જ્યારે કોહલીએ થ્રો આર્મ સ્પેશિયાલિસ્ટના બોલ પર બેટિંગની પ્રેક્ટિસ કરી હતી.
આ બે ઉપરાંત યુવા ઓપનર યશસ્વી જયસ્વાલ, શુભમન ગિલ અને રિષભ પંતે પણ નેટ્સમાં બેટિંગની પ્રેક્ટિસ કરતી વખતે ઘણો પરસેવો પાડ્યો હતો. પંત ટીમ ઈન્ડિયાના ઓલરાઉન્ડર નીતિશ કુમાર રેડ્ડીના બોલ પર પ્રેક્ટિસમાં વ્યસ્ત જોવા મળ્યો હતો.
છેલ્લા 10 વર્ષમાં મેલબોર્નમાં ટીમ ઈન્ડિયાનો ટેસ્ટ રેકોર્ડ શાનદાર રહ્યો છે. આ મેદાન પર ભારતીય ટીમને છેલ્લી વખત 2011માં હારનો સામનો કરવો પડ્યો હતો. ત્યારથી તેને મેલબોર્ન સ્ટેડિયમમાં ક્યારેય હારનો સામનો કરવો પડ્યો નથી. 2014માં આ મેદાન પર બોર્ડર ગાવસ્કર ટ્રોફીની ત્રીજી મેચ રમાઈ હતી જે ડ્રો રહી હતી. આ પછી, 2018 અને ફરીથી 2020માં, ટીમ ઈન્ડિયાએ મેલબોર્નમાં સતત જીત મેળવી. (All Photo Credit : X / BCCI)
