IND vs AUS: નીતિશ કુમાર રેડ્ડી પર પૈસાનો વરસાદ, સદી ફટકારતાની સાથે જ ઈનામની જાહેરાત
નીતિશ કુમાર રેડ્ડીએ મેલબોર્ન ટેસ્ટના ત્રીજા દિવસે શાનદાર સદી ફટકારીને ટીમ ઈન્ડિયાને પ્રથમ દાવમાં મુશ્કેલીમાંથી બહાર લાવી હતી. તેની સદીએ સ્ટેડિયમમાં બેઠેલા દર્શકોથી લઈને ભારતમાં હાજર દરેક પ્રશંસક સુધી બધાને ખુશ કરી દીધા હતા. સદી ફટકારતાની સાથે જ નીતિશ કુમાર રેડ્ડી પર પૈસાનો વરસાદ થયો છે.
આંધ્ર પ્રદેશના વિશાખાપટ્ટનમથી આવેલા નીતિશની આ સિદ્ધિએ રાજ્ય ક્રિકેટ એસોસિએશનને ગર્વ કરવાનું કારણ પણ આપ્યું. આ યુવા ઓલરાઉન્ડરની યાદગાર સદી બાદ આંધ્ર ક્રિકેટ એસોસિએશનના પ્રમુખ અને સાંસદ કેસીનેની શિવનાથે 'X' પર એક પોસ્ટમાં નીતીશને અભિનંદન આપ્યા હતા અને જાહેરાત કરી હતી કે આ સિદ્ધિ અને સખત મહેનત માટે તેમને એસોસિએશન દ્વારા 25 લાખ રૂપિયાનું ઈનામ પણ આપવામાં આવશે.
નીતિશે ઓસ્ટ્રેલિયાના આ પ્રવાસમાં જ ટેસ્ટ ડેબ્યુ કર્યું છે. તેણે પોતાની કારકિર્દીની શરૂઆત પર્થ ટેસ્ટમાં કરી હતી અને પ્રથમ દાવમાં સૌથી વધુ 41 રન બનાવ્યા હતા. બીજી ઈનિંગમાં પણ તેણે 38 રનની ઝડપી અણનમ ઈનિંગ રમી હતી. ત્યારબાદ એડિલેડ ટેસ્ટમાં પણ તેના બેટમાંથી બંને ઈનિંગ્સમાં 42-42 રન બનાવ્યા હતા. મેલબોર્ન ટેસ્ટની વાત કરીએ તો ત્રીજા દિવસની રમતના અંત સુધી તે 105 રન બનાવીને અણનમ રહ્યો હતો. અત્યાર સુધી નીતિશે આ સિરીઝની 6 ઈનિંગ્સમાં 284 રન બનાવ્યા છે અને તે સિરીઝમાં ભારત માટે સૌથી વધુ રન બનાવનાર બેટ્સમેન છે. (All Photo Credit : PTI )
