Agnipath Scheme: બિહારમાં સેનાની અગ્નિપથ યોજનાનો વિરોધ, યુવાનોએ કર્યુ રસ્તા રોકો, ટ્રેન પર પથ્થરમારો
સેનામાં ભરતીની તૈયારી કરી રહેલા યુવાનોએ નવી અગ્નિપથ યોજનાનો વિરોધ કરતાં, બક્સરમાં પટના જતી પાટલીપુત્ર એક્સપ્રેસ ટ્રેન પર પથ્થરમારો કર્યો હતો.
કેન્દ્ર સરકારે મંગળવારે સેનામાં ટૂંકા કમિશન માટે જાહેર કરેલી અગ્નિપથ યોજનાને (Agnipath Scheme) લઈને બિહારમાં હોબાળો મચ્યો છે. અગ્નિપથ યોજનાનો વિરોધ કરતાં યુવાનોએ બક્સરમાં (Buxar) ટ્રેન પર પથ્થરમારો કર્યો, જ્યારે મુઝફ્ફરપુરમાં (Muzaffarpur) રસ્તાઓ પર પણ લોકો ઉતરી આવ્યા છે. ઘણી જગ્યાએ ચક્કાજામ કરાયા હોવાના પણ સમાચાર છે. બિહારના યુવાનો સેનામાં ભરતીના નિયમોમાં ફેરફારનો ભારે વિરોધ કરી રહ્યા છે. સેનામાં ભરતીની તૈયારી કરી રહેલા યુવાનોએ, નવી યોજનાનો વિરોધ કરતાં, બક્સરમાં પટના જતી પાટલીપુત્ર એક્સપ્રેસ ટ્રેન પર પથ્થરમારો કર્યો હતો. કાશી પટના જનશતાબ્દી એક્સપ્રેસ (Patna Janshatabdi Express) સહિત કેટલીક ટ્રેનો રોકી દેવાના સમાચાર પણ છે. મુઝફ્ફરપુરમાં આંદોલનકારીઓએ ચક્કર મેદાન અને રેલવે સ્ટેશન પાસે હોબાળો મચાવ્યો હતો. ભગવાનપુર ગોલામ્બરમાં સેંકડો યુવાનો સૂત્રોચ્ચાર કરતા જોવા મળ્યા હતા. અહીં NH 28 બ્લોક કરવામાં આવ્યો હતો. પોલીસ અને પ્રદર્શનકારીઓ વચ્ચે અથડામણ થઈ હતી.
કેન્દ્રીય દળો અને આસામ રાઈફલ્સમાં અગ્નિવીરોને પ્રાધાન્ય આપશેઃ ગૃહ મંત્રાલય
દરમિયાન, કેન્દ્રીય ગૃહ મંત્રાલયે જણાવ્યું હતું કે ‘અગ્નિપથ યોજના’ હેઠળ ચાર વર્ષ પૂરા કરનારા અગ્નિવીરોને સેન્ટ્રલ સિક્યુરિટી ફોર્સ (CAPFs) અને આર્મીની આસામ રાઈફલ્સમાં ભરતીમાં પ્રાથમિકતા આપવામાં આવશે. ગૃહ મંત્રાલયે બુધવારે ટ્વીટ કરીને આ જાણકારી આપી હતી.
કેન્દ્રીય ગૃહ મંત્રાલયે તેના ટ્વીટમાં લખ્યું છે કે અગ્નિપથ યોજના યુવાનોના ઉજ્જવળ ભવિષ્ય માટે પીએમ નરેન્દ્ર મોદીનું સ્વપ્નદ્રષ્ટા અને આવકારદાયક વિઝન છે. અગ્નિપથ યોજના દ્વારા પ્રશિક્ષિત યુવાનો આગળ પણ દેશની સેવા અને સુરક્ષામાં યોગદાન આપી શકશે. આ નિર્ણય અંગે વિગતવાર આયોજનની કામગીરી શરૂ કરી દેવામાં આવી છે.
અગ્નિપથ યોજના શું છે?
‘અગ્નિપથ ભરતી યોજના’ હેઠળ યુવાનોને ચાર વર્ષના સમયગાળા માટે સેનામાં જોડાવાની તક મળશે. સાડા 17 વર્ષથી 21 વર્ષની વયજૂથના યુવક-યુવતીઓ આ માટે લાયક ગણાશે. આ માટે ધોરણ 10 થી 12 સુધીના વિદ્યાર્થીઓ અરજી કરી શકે છે. તે 90 દિવસમાં શરૂ થશે. આ વર્ષે 46 હજાર અગ્નિવીરોની ભરતી કરવામાં આવશે. પ્રથમ ભરતી પ્રક્રિયામાં યુવાનોને છ મહિનાની તાલીમ આપવામાં આવશે. તાલીમનો સમય પણ ચાર વર્ષમાં આવરી લેવામાં આવશે.
દરેક અગ્નિવીરને ભરતીના વર્ષમાં 30 હજાર મહિનાનો પગાર મળશે. તેમાંથી 70 ટકા એટલે કે 21 હજાર રૂપિયા તેને આપવામાં આવશે. બાકીના 30 ટકા એટલે કે નવ હજાર રૂપિયા અગ્નિવીર કોર્પ્સ ફંડમાં જમા કરવામાં આવશે. સરકાર આ ફંડમાં પણ એટલી જ રકમ નાખશે. અગ્નિવીરનો પગાર બીજા વર્ષે 33 હજાર, ત્રીજા વર્ષે 36.5 હજાર અને ચોથા વર્ષે 40 હજાર રૂપિયા થઈ જશે.