UP: હાપુડની શાળાના શિક્ષકે બે અનુસૂચિત જાતિની વિદ્યાર્થિનીને યુનિફોર્મ ઉતારવા પાડી ફરજ, જાણો શુ છે આખો મામલો
હાપુડની એક સરકારી શાળામાં શિક્ષકોએ બે અનુસૂચિત જાતિની વિદ્યાર્થિનીને યુનિફોર્મ ઉતારવાની ફરજ પાડી હોવાનો કિસ્સો સામે આવ્યો છે. આ ઘટના 11 જુલાઈના રોજ બની હતી. ઘટના સામે આવ્યા બાદ પોલીસે બંને શિક્ષકો સામે ગુનો પણ નોંધ્યો છે.
ઉત્તર પ્રદેશ (UP)ના હાપુડ (Hapur)માં એક સરકારી શાળામાં શિક્ષકો દ્વારા બે અનુસૂચિત જાતિ (SC)ની વિદ્યાર્થિનીને તેમનો યુનિફોર્મ ઉતારવા દબાણ કરવાનો મામલો સામે આવ્યો છે. આ ઘટના 11 જુલાઈની છે. આ મામલો સામે આવ્યા બાદ જિલ્લા શિક્ષણ વિભાગે શિક્ષકોને સસ્પેન્ડ કીરી દેવામાં આવ્યા છે. જોકે પોલીસે પણ બંને શિક્ષકો વિરુદ્ધ કેસ નોંધ્યો છે. આ ઘટના ધૌલાના બ્લોકના દહીરપુર ગામમાં આવેલી કમ્પોઝિટ પ્રાથમિક શાળાની હોવાનું જણાવાયુ છે. આ શાળામાં ભણતી બે અનુસૂચિત જાતિની વિદ્યાર્થિનીઓએ શાળાના બે શિક્ષકો પર યુનિફોર્મ (UniForm)ઉતારી અન્ય છોકરીઓને પહેરાવવાનો આરોપ લગાવ્યો છે. બંને વિદ્યાર્થિનીના વાલીઓના જણાવ્યા અનુસાર, શિક્ષકો સ્કૂલ ડ્રેસમાં વિદ્યાર્થિનીઓના ફોટા લઈ રહ્યા હતા, પરંતુ શિક્ષકોએ તેમની દીકરીઓના ફોટા ન લીધા,ઉલટાનુ તેમનો યુનિફોર્મ ઉતારી અન્ય બે વિદ્યાર્થિનીને આપવા કહ્યુ હતુ. જે તે દિવસે સ્કૂલ ડ્રેસમાં આવી ન હતી.
માર મારી ઉતારાવ્યો યુનિફોર્મ
વાલીઓએ આરોપ લગાવ્યો છે કે શિક્ષકોએ તેમની જાતિના કારણે તેમની દીકરીઓ સાથે ભેદભાવ કર્યો છે. એક વિદ્યાર્થિનીના માતાનો આરોપ શિક્ષક શાળાના યુનિફોર્મમાં વિદ્યાર્થીઓની તસવીરો ક્લિક કરી રહ્યા હતા, પરંતુ મારી દીકરીનો ફોટો લેવામાં આવ્યો ન હતો, તેના બદલે મારી પુત્રીને તેનો યુનિફોર્મ ઉતારીને અન્ય છોકરીને આપવાનું કહેવામાં આવ્યું હતું. જ્યારે તેણીએ આવું કરવાની ના પાડી તો તેને માર માર્યો અને બળજબરીથી તેનો યુનિફોર્મ ઉતારી દીધો.
પોલીસે બંને શિક્ષકો સામે ગુનો નોંધ્યો હતો
આ મામલો સામે આવ્યા બાદ હાપુડ જિલ્લા પ્રાથમિક શિક્ષણ અધિકારી અર્ચના ગુપ્તાએ 13મી જુલાઈએ બંને શિક્ષકોને સસ્પેન્ડ કરી દીધા હતા. BSAએ આ મામલાની તપાસ બ્લોક એજ્યુકેશન ઓફિસરને પણ સોંપી દીધી હતી, પરંતુ હવે આ મામલામાં ફરિયાદ મળ્યા બાદ પોલીસે બંને શિક્ષકો વિરુદ્ધ કેસ નોંધ્યો છે. હાપુડના સહાયક પોલીસ અધિક્ષકે જણાવ્યું કે બંને શિક્ષકો વિરુદ્ધ કલમ 323, 504, 166 હેઠળ FIR નોંધવામાં આવી છે. આ સાથે જ કલમ 505, 355 અને કલમ 3(2)(v) અને SC/ST એક્ટ હેઠળ પોલીસ આ મામલે વધુ તપાસ કરી રહી છે.
શિક્ષકોએ કહ્યું કે બાળકો સાથે નથી કર્યો ભેદભાવ
આ તરફ શિક્ષકોનું કહેવું છે કે તેઓએ કોઈ બાળક સાથે ભેદભાવ કર્યો નથી. આરોપી શિક્ષકનું કહેવું છે કે તમામ બાળકોને 11 જુલાઈએ સંપૂર્ણ સ્કૂલ યુનિફોર્મ પહેરીને સ્કૂલ આવવાની સૂચના આપવામાં આવી હતી. તે દિવસે વિદ્યાર્થીઓની તસવીરો લેવાની હતી. જો કે કેટલાક વિદ્યાર્થીઓ સંપૂર્ણ ગણવેશમાં આવ્યા ન હતા. જેના કારણે યુનિફોર્મમાં આવેલા વિદ્યાર્થીઓને ફોટો ક્લિક કરવા માટે યુનિફોર્મમાં ન હોય તેવા બાળકોને તેમનો ડ્રેસ આપવાનું કહેવામાં આવ્યું હતું.
શિક્ષકે કહ્યું કે મને ખ્યાલ નથી કે આવું કંઈ થયું છે. 12 જુલાઈએ જ્યારે બંને છોકરીઓના માતા-પિતા સ્કૂલમાં આવ્યા અને અમારી પૂછપરછ કરવા લાગ્યા. તે જ સમયે અમને ખબર પડી. તો અન્ય શિક્ષિકાનું કહેવું છે કે તેણે છોકરીઓને ના તો માર માર્યો હતો ના તો તેમને ગણવેશ ઉતારવા માટે મજબુર કરી હતી.