દિલ્હીમાં ફટાકડા પર પ્રતિબંધને લઈને મનોજ તિવારી ચુકાદા સામે SCમાં પહોંચ્યા,10 ઓક્ટોબરે સુનાવણી
પર્યાવરણ મંત્રી (Environment Minister) ગોપાલ રાયે કહ્યું હતું કે તમામ પ્રકારના ફટાકડાના ઉત્પાદન, સંગ્રહ, વેચાણ અને ઉપયોગ પર સંપૂર્ણ પ્રતિબંધ લાદવામાં આવી રહ્યો છે. ફટાકડાના ઓનલાઈન વેચાણ અને ડિલિવરી પર પણ પ્રતિબંધ રહેશે.
દિલ્હીમાં (Delhi) દિવાળી દરમિયાન ફટાકડા પર પ્રતિબંધના વિરોધમાં ભાજપના સાંસદ મનોજ તિવારીએ સુપ્રીમ કોર્ટનો (Supreme Court) સંપર્ક કર્યો છે. મનોજ તિવારીની અરજી પર સુનાવણી કરવા સુપ્રીમ કોર્ટ સંમત થઈ છે. કોર્ટ આ મામલે 10 ઓક્ટોબરે સુનાવણી કરશે. મનોજ તિવારીએ દિલ્હીમાં પ્રદૂષણના (Pollution) આધારે તમામ પ્રકારના ફટાકડાના ઉત્પાદન અને વેચાણ પર પ્રતિબંધ લગાવવાના દિલ્હી સરકારના નિર્ણયને પડકાર્યો છે. કેજરીવાલ સરકારે 7 સપ્ટેમ્બરના રોજ 1 જાન્યુઆરી 2023 સુધી દિલ્હીમાં ફટાકડા પર સંપૂર્ણ પ્રતિબંધ લગાવી દીધો છે.
દિલ્હી સરકારના નિર્ણય સામેની તેમની અરજીમાં સાંસદ મનોજ તિવારીએ કેજરીવાલ સરકારને આગામી તહેવારોની સીઝન દરમિયાન કાયદેસરના ફટાકડાના વેચાણ, ખરીદી અને ફોડવા અંગે નવી સૂચનાઓ જાહેર કરવાની માગ કરી છે. તે જ સમયે, તેમણે તમામ રાજ્યોને ફટાકડા વેચતા અથવા તેનો ઉપયોગ કરતા સામાન્ય લોકો સામે દંડાત્મક પગલાં ન લેવાનો નિર્દેશ આપવાની પણ માગ કરી છે.
હિન્દુઓને નિશાન બનાવવાનો આરોપ
સાંસદ મનોજ તિવારીએ જણાવ્યું હતું કે દિલ્હીમાં હિન્દુઓ, શીખો, ખ્રિસ્તીઓ અને અન્યના તહેવારોની મોસમ દરમિયાન ફટાકડાના વેચાણ, ખરીદી અને ઉપયોગ પર સંપૂર્ણ પ્રતિબંધ લાદવામાં આવ્યો છે. એવું માનવામાં આવે છે કે ગયા વર્ષની જેમ અન્ય રાજ્યો પણ તેના પર પ્રતિબંધ લગાવી શકે છે. મનોજ તિવારીએ આરોપ લગાવ્યો કે આ નિર્ણયને કારણે દિવાળી પર હિન્દુઓને નિશાન બનાવીને ધરપકડ કરવામાં આવી હતી. તેમણે કહ્યું કે ભારતીયોને તેમના તહેવારો પર વારંવાર નિશાન બનાવવામાં આવ્યા છે.
વેપારીઓને ભારે નુકસાન
ભાજપ સાંસદે કહ્યું કે દિલ્હીના સીએમ અરવિંદ કેજરીવાલે ફરી એકવાર 2022માં ઔરંગઝેબની જેમ મનસ્વી પ્રતિબંધ લગાવ્યો છે. જેનાથી વેપારીઓને ભારે નુકસાન થશે. કારણ કે કોરોનાકાળના નુકસાન પછી તેમની આજીવિકા પર અવરોધ ઊભો થયો છે.
ઓનલાઈન વેચાણ અને ડિલિવરી પર પણ પ્રતિબંધ
દિલ્હી સરકારે 1 જાન્યુઆરી 2023 સુધી તમામ પ્રકારના ફટાકડાના ઉત્પાદન, વેચાણ અને ઉપયોગ પર સંપૂર્ણ પ્રતિબંધ લગાવી દીધો છે. આ અંગે પર્યાવરણ મંત્રી ગોપાલ રાયે કહ્યું હતું કે શિયાળામાં દિલ્હીમાં પ્રદૂષણ ફેલાવવાનું એક મોટું કારણ ફટાકડા છે. આવી પરિસ્થિતિને ધ્યાનમાં રાખીને તમામ પ્રકારના ફટાકડાના ઉત્પાદન, સંગ્રહ, વેચાણ અને ઉપયોગ પર સંપૂર્ણ પ્રતિબંધ લાદવામાં આવી રહ્યો છે, જેથી કરીને જીવ બચાવી શકાય. તેમણે કહ્યું હતું કે દિલ્હીમાં ફટાકડાના ઓનલાઈન વેચાણ અને ડિલિવરી પર પણ પ્રતિબંધ રહેશે. મંત્રીએ કહ્યું કે ગયા વર્ષે દિલ્હીમાં ફટાકડા ફોડવાની ઘણી ઘટનાઓ બની હતી કારણ કે તે સરળતાથી ઓનલાઈન ઉપલબ્ધ હતા.
Latest News Updates
