હાઈ લેવલ મીટિંગમાં PM મોદીએ કહ્યું ‘કોરોનાને ગયા વર્ષે હરાવ્યો હતો, બીજી વખત ઝડપથી હરાવી શકીએ છીએ’
દેશમાં સતત કોરોના વાઈરસના કેસ વધી રહ્યા છે. દરરોજ રેકોર્ડબ્રેક આંકડા સામે આવી રહ્યા છે. વડાપ્રધાન મોદીએ વધતા કેસોને જોતા કેન્દ્ર સરકારના વિભિન્ન મંત્રાલયોના ટોચના અધિકારીઓ સાથે બેઠક કરી.
દેશમાં સતત કોરોના વાઈરસના કેસ વધી રહ્યા છે. દરરોજ રેકોર્ડબ્રેક આંકડા સામે આવી રહ્યા છે. વડાપ્રધાન મોદીએ વધતા કેસોને જોતા કેન્દ્ર સરકારના વિભિન્ન મંત્રાલયોના ટોચના અધિકારીઓ સાથે બેઠક કરી. આ દરમિયાન તેમને કોરોના વાઈરસ અને રસીકરણની સ્થિતિની માહિતી મેળવી. તેમને કહ્યું કે ટેસ્ટિંગ, ટ્રેકિંગ અને સારવારનો કોઈ વિકલ્પ નથી.
વડાપ્રધાન મોદીની અધ્યક્ષતામાં કોરોના સમીક્ષા બેઠક દરમિયાન દવાઓ, ઓક્સિજન, વેન્ટિલેટર અને રસીકરણથી સંબંધિત અલગ અલગ મુદ્દાઓ પર ચર્ચા કરવામાં આવી. તેમને કહ્યું કે કોરોનાના દર્દી માટે હોસ્પિટલના બેડની ઉપલબ્ધતાને વધારવા માટે તમામ જરૂરી ઉપાયો કરવામાં આવે. વડાપ્રધાને ટ્વીટ કરીને જણાવ્યું કે આ બેઠકમાં દવાઓ, ઓક્સિજન, વેન્ટિલેટર અને રસીકરણથી સંબંધિત મુદ્દાઓ પર ચર્ચા કરવામાં આવી. જે રીતે ગયા વર્ષે કર્યુ હતું. આપણે કોરોના સામે વધુ ઝડપથી અને સંકલનથી સફળતાપૂર્વક લડીશું.
કોરોનાને લઈ સતત બેઠક કરી રહ્યા છે વડાપ્રધાન
આ પહેલા વડાપ્રધાને ઉપરાષ્ટ્રપતિ એમ. વેંકૈયા નાયડૂની સાથે રાજ્યપાલો અને ઉપરાજ્યપાલોની સાથે બેઠક કરી હતી. આ બેઠકમાં પણ કોરોનાની સ્થિતિ પર ચર્ચા કરવામાં આવી હતી. આ પહેલા પણ વડાપ્રધાન તમામ રાજ્યોના મુખ્યપ્રધાનોની સાથે બે બેઠક કરી ચૂક્યા છે.
દેશમાં સતત વધી રહ્યા છે કોરોનાના કેસ
વડાપ્રધાન મોદીએ દેશમાં સતત વધતા કોરોના કેસો પર ચિંતા વ્યક્ત કરી છે. કેન્દ્રીય સ્વાસ્થ્ય મંત્રાલયના આંકડા મુજબ દેશમાં શનિવારે કોરોનાના રેર્કોડબ્રેક 2,34,692 નવા કેસ નોંધાયા છે. ત્યારબાદ અત્યાર સુધી સંક્રમિત થઈ ચૂકેલા લોકોની કુલ સંખ્યા વધીને 1 કરોડ 45 લાખ 26 હજાર 609 થઈ ગઈ છે.