રશિયા યુક્રેન યુદ્ધને આજે થયા 6 મહિના, રશિયા આક્રમક બનીને હુમલા વધારવાની ભીતિને પગલે યુક્રેન છોડવા અમેરિકન નાગરિકોને USAની ચેતવણી
Russia Ukraine crisis ફેબ્રુઆરીના અંતમાં રશિયાએ યુક્રેન પર આક્રમણ કર્યું ત્યારથી લગભગ 9,000 યુક્રેનિયન સૈનિકો લડાઇમાં માર્યા ગયા છે. યુક્રેનના લશ્કરી વડા વેલેરી ઝાલુઝનીએ એક કાર્યક્રમમાં જણાવ્યું હતું કે યુક્રેનમાં ઘણા બાળકોની સંભાળ રાખવાની જરૂર છે કારણ કે તેમના પિતા યુદ્ધમાં અગ્રીમ હરોળમાં રશિયા સામે લડી રહ્યાં છે.
Russia-Ukraine War: રશિયા (Russia) દ્વારા 24 ફેબ્રુઆરીએ શરૂ કરાયેલ યુક્રેન (Ukraine) પર હુમલાને ચાલુ રાખીને બુધવારે છ મહિના પૂર્ણ થશે. દરમિયાન, મંગળવારે, યુએસએ તેના નાગરિકોને તાત્કાલિક યુક્રેન છોડવા વિનંતી કરી છે. કારણ કે રશિયા આગામી થોડા દિવસોમાં નાગરિકો અને માળખાગત સુવિધાઓને નિશાન બનાવવાની તૈયારી કરી રહ્યું હોવાના અમેરિકા પાસે ગુપ્તચર અહેવાલ છે. રશિયા દ્વારા વધુ હુમલા કરાઈ શકે છે, તેવી અપેક્ષા રાખીને, યુક્રેને પણ સોવિયેત શાસનથી સ્વતંત્રતાની વર્ષગાંઠે બુધવારે કિવમાં ઉજવણી પર પ્રતિબંધની જાહેરાત કરી છે. દરમિયાન, દક્ષિણપૂર્વ યુક્રેનના ઝાપોરિઝિયા વિસ્તારમાં રશિયન દળો દ્વારા આર્ટિલરી અને હવાઈ હુમલા ચાલુ છે. યુરોપનો સૌથી મોટો ન્યુક્લિયર પાવર પ્લાન્ટ પણ અહીં છે.
કાળો સમુદ્ર કિનારો અને પૂર્વીય ડોનબાસ પ્રદેશનો ભાગ સહિતના પ્રદેશમાં રશિયન દળો એક વિશાળ વિસ્તાર ઉપર કબજો કરી લીધો છે અને આ વિસ્તાર તેઓ નિયંત્રિત કરે છે. છ મહિના જેટલો સમય વીતી જવા છતાં આ યુદ્ધમાં શાંતિની સંભાવનાઓ અત્યારે લગભગ નહિવત છે. યુક્રેનના રાષ્ટ્રપતિ વોલોડીમિર ઝેલેન્સકીને (Volodymyr Zelensky) આશંકા છે કે રશિયા બુધવારે સ્વતંત્રતા દિવસ પહેલા મોટી સૈન્ય કાર્યવાહી કરી શકે છે.
યુક્રેનને રશિયન બોમ્બ ધડાકાનો ડર છે
યુક્રેનના લોકોને ડર છે કે સ્વતંત્રતા દિવસની રજા દરમિયાન રશિયા તેમની સરકાર અને નાગરિક સ્થાનોને નિશાન બનાવી શકે છે. યુએસએ પહેલેથી જ કહ્યું છે કે રશિયા આગામી દિવસોમાં યુક્રેનિયન નાગરિક માળખાગત સુવિધાઓ અને સરકારી સુવિધાઓ પર હુમલા શરૂ કરવાની યોજના ધરાવે છે. સૌથી વધુ ભય યુક્રેનમાં યુરોપના સૌથી મોટા ન્યુક્લિયર પાવર પ્લાન્ટ પર હુમલાની છે.
હુમલા બાદ યુએસએ 5,000 રશિયનો પર પ્રતિબંધ મૂક્યો છે
24 ફેબ્રુઆરીએ યુક્રેન પર રશિયાના હુમલા બાદ યુ.એસ.એ લગભગ 5,000 નાગરિકો પર પ્રતિબંધો લાદ્યા હતા, જેમાં મોસ્કોના ટોચના નેતૃત્વ અને ઉચ્ચ વર્ગના લોકોનો સમાવેશ થાય છે. આ વાતની પુષ્ટિ કરતા વિદેશ વિભાગના પ્રવક્તા નેડ પ્રાઈસે કહ્યું કે અમે રશિયન હુમલામાં સામેલ લોકોની ઓળખ કરવાનું ચાલુ રાખીશું અને તેમને આ યુદ્ધ માટે જવાબદાર ઠેરવીશું. અમે ક્રેમલિનને જવાબદાર રાખવાના તમામ પગલાઓ પર વિચાર કરી રહ્યા છીએ. તેમણે આરોપ લગાવ્યો કે રશિયા યુક્રેનની લોકશાહી અને તેના નાગરિકોની સ્વતંત્રતા પર બર્બર હુમલો કરી રહ્યું છે.
અત્યાર સુધીમાં લગભગ 9,000 યુક્રેનિયન સૈનિકો માર્યા ગયા
ફેબ્રુઆરીના અંતમાં રશિયાએ યુક્રેન પર આક્રમણ કર્યું ત્યારથી અત્યાર સુધીમાં લગભગ 9,000 યુક્રેનિયન સૈનિકો યુદ્ધમાં માર્યા ગયા છે. યુક્રેનના લશ્કરી વડા વેલેરી ઝાલુઝનીએ એક કાર્યક્રમમાં જણાવ્યું હતું કે યુક્રેનમાં ઘણા બાળકોની સંભાળ રાખવાની જરૂર છે કારણ કે તેમના પિતા યુદ્ધમાં અગ્રીમ હરોળમાં રહીને રશિયા સામે યુદ્ધ લડી રહ્યાં છે.
યુનાઇટેડ નેશન્સ અનુસાર, 24 ફેબ્રુઆરીએ યુક્રેન પર રશિયાના હુમલાથી અત્યાર સુધીમાં 5,587 યુક્રેનિયન માર્યા ગયા છે અને 7,890 અન્ય ઘાયલ થયા છે. બીજી બાજુ, યુનિસેફે અહેવાલ આપ્યો છે કે રશિયન ક્રેકડાઉનની શરૂઆતથી 972 યુક્રેનિયન બાળકો માર્યા ગયા છે અથવા ઘાયલ થયા છે. જ્યારે વાસ્તવિક સંખ્યા ઘણી વધારે છે.
Latest News Updates
