મતદાન મથકો સળગ્યા, બાંગ્લાદેશમાં મતદાન ચાલુ, શેખ હસીનાનું PM બનવાનું નિશ્ચિત!
સામાન્ય ચૂંટણી પહેલા બાંગ્લાદેશના 10 જિલ્લામાં ઓછામાં ઓછા 14 મતદાન મથકો અને બે શાળાઓને આગ ચાંપી દેવામાં આવી હતી. તમામ મતક્ષેત્રોમાં ચુસ્ત સુરક્ષા વ્યવસ્થા ગોઠવવામાં આવી છે. 436 અપક્ષ ઉમેદવારો પણ ચૂંટણી મેદાનમાં છે. ચૂંટણી પંચનું કહેવું છે કે જો ચૂંટણીમાં કોઈ ગેરરીતિ જોવા મળશે તો ચૂંટણી સંપૂર્ણપણે રદ કરવામાં આવશે.
હિંસા વચ્ચે આજે બાંગ્લાદેશમાં સામાન્ય ચૂંટણી માટે મતદાન ચાલુ છે. લગભગ 12 કરોડ મતદારો આગામી સરકાર નક્કી કરશે. મુખ્ય વિરોધ પક્ષ બાંગ્લાદેશ નેશનાલિસ્ટ પાર્ટી (BNP) છે, જેણે શેખ હસીનાના રાજીનામાની માંગ કરી છે. આ પાર્ટી પૂર્વ વડાપ્રધાન ખાલિદા ઝિયાની છે, જે ચૂંટણીનો બહિષ્કાર કરી રહી છે અને વર્તમાન સરકારને ગેરકાયદે ગણાવીને 48 કલાકની દેશવ્યાપી હડતાળનું પણ આહ્વાન કર્યું છે.
વોટિંગને લઈને વડાપ્રધાન શેખ હસીનાએ કહ્યું કે આપણો દેશ સાર્વભૌમ અને સ્વતંત્ર છે. આપણી વસ્તી મોટી છે. અમે લોકોના લોકતાંત્રિક અધિકારો સ્થાપિત કર્યા છે. હું સુનિશ્ચિત કરવા માંગુ છું કે આ દેશમાં લોકશાહી ચાલુ રહે. શેખ હસીનાએ ભારત માટેના પોતાના સંદેશમાં કહ્યું કે અમે ઘણા ભાગ્યશાળી છીએ. ભારત અમારો વિશ્વાસુ મિત્ર છે. તેમણે અમારા મુક્તિ સંગ્રામ દરમિયાન અમને ટેકો આપ્યો હતો. 1975 પછી જ્યારે અમે અમારું આખું કુટુંબ ગુમાવ્યું ત્યારે તેમણે અમને આશ્રય આપ્યો. તેથી ભારતના લોકોને અમારી શુભકામનાઓ.
બાંગ્લાદેશમાં મતદાન પહેલા ચૂંટણી પંચની ચૂંટણી એપ ક્રેશ થઈ ગઈ છે. પંચે મતદારોની ચૂંટણી સંબંધિત વિગતો શોધવા માટે એપ લોન્ચ કરી હતી. શેખ હસીના સતત ચોથી વખત વડાપ્રધાન બનશે તે નિશ્ચિત માનવામાં આવે છે. તેમના વિશે એવું કહેવાય છે કે તેમણે ગરીબીમાંથી સંઘર્ષ કરી રહેલા દેશને ઉગારીને વિકાસની દિશામાં કદમ ઉઠાવ્યા છે. જો કે, તેમની સરકાર પર મોટા પાયે માનવાધિકાર ઉલ્લંઘન અને વિપક્ષો સામે ક્રૂર કાર્યવાહીનો પણ આરોપ છે.
હસીનાની પાર્ટી જે બેઠકો પર ચૂંટણી લડી રહી છે ત્યાં લગભગ કોઈ અસરકારક હરીફ નથી, તેથી તેમની જીત નિશ્ચિત માનવામાં આવે છે. ફરિદપુરના મધ્ય જિલ્લામાં રહેતા 64 વર્ષીય લાલ મિયા કહે છે કે જો હું મતદાન નહીં કરું તો મારી પાસેથી સરકારી સહાય જપ્ત કરવામાં આવશે. સરકાર અમને ખવડાવે છે તેથી અમારે તેમને મત આપવો પડશે. બીએનપી અને અન્ય પક્ષોએ ગયા વર્ષે હસીનાના રાજીનામાની માંગણી સાથે વિરોધ પ્રદર્શન કર્યું હતું.
10 જિલ્લાઓમાં ઓછામાં ઓછા 14 મતદાન મથકોને સળગાવી દેવામાં આવ્યા હતા
ઢાકા ટ્રિબ્યુનના અહેવાલ મુજબ, સામાન્ય ચૂંટણી પહેલા બાંગ્લાદેશના 10 જિલ્લાઓમાં ઓછામાં ઓછા 14 મતદાન મથકો અને બે શાળાઓને આગ લગાડવામાં આવી હતી. આ પહેલા શનિવારે લાલમોનિરહાટના હાથીબંધા ઉપજિલ્લામાં બદમાશોએ એક મતદાન મથકને આગ લગાવી દીધી હતી.
શેઠ સુંદર માસ્ટરપરા પ્રાથમિક શાળા નામના કેન્દ્રમાં શનિવારે રાત્રે 10 વાગ્યાના સુમારે આગ લાગી હતી. આ સિવાય શનિવારે મૈમનસિંહમાં એક સેન્ટરમાં આગ લગાવ્યા બાદ પાંચ લોકોની ધરપકડ કરવામાં આવી હતી.
ચૂંટણી પંચનું કહેવું છે કે દેશભરના તમામ મતવિસ્તારોમાં મતદાનની તૈયારીઓ લગભગ પૂર્ણ થઈ ગઈ છે અને સુરક્ષા વ્યવસ્થા પણ સુનિશ્ચિત કરવામાં આવી છે. બાંગ્લાદેશમાં સંસદમાં 300 બેઠકો છે. એક મતદાનક્ષેત્રમાં અપક્ષ ઉમેદવારના મૃત્યુ બાદ ચૂંટણી મોકૂફ રાખવામાં આવી છે. કુલ 11 કરોડ 96 લાખ મતદારો છે. દેશમાં કુલ 42,000થી વધુ મતદાન મથકો બનાવવામાં આવ્યા છે. 27 રાજકીય પક્ષોના 1,500થી વધુ ઉમેદવારો ઉપરાંત 436 અપક્ષ ઉમેદવારો ચૂંટણી લડી રહ્યા છે.
કડક સુરક્ષા વચ્ચે યોજાઈ રહી છે ચૂંટણી
12મી સામાન્ય ચૂંટણીઓ પર ત્રણ ભારતીયો સહિત 100થી વધુ વિદેશી નિરીક્ષકો દ્વારા દેખરેખ રાખવામાં આવશે. આ ચૂંટણી કડક સુરક્ષા વચ્ચે યોજાઈ રહી છે. મુખ્ય ચૂંટણી કમિશનર (CEC) કાઝી હબીબુલ અવલે ચેતવણી આપી છે કે જો ચૂંટણીમાં કોઈ ગેરરીતિ જોવા મળશે તો ચૂંટણી સંપૂર્ણપણે રદ કરવામાં આવશે.
મતની હેરાફેરી, બેલેટ પેપર છીનવી લેવા, પૈસાની લેવડ-દેવડ અને કોઈપણ ઉમેદવાર કે ઉમેદવારોની તરફેણમાં બળનો સંભવિત ઉપયોગનો સખત વિરોધ કરવામાં આવશે. જો પુરાવા મળશે તો તેમની ઉમેદવારી તાત્કાલિક રદ કરવામાં આવશે. જો જરૂરી હોય તો, કેન્દ્ર અથવા મતવિસ્તારમાં મતદાન સંપૂર્ણપણે સ્થગિત કરવામાં આવશે.
આ પણ વાંચો: ચાલબાજ ચીનની વધુ એક ચાલ, મ્યાનમારને પ્યાદુ બનાવીને ભારત પર નજર રાખવાનો પેંતરો
