America : ગર્ભપાત અધિકારોને લઈને વિરોધ યથાવત, સમર્થકોએ રેલી યોજી કર્યો સુત્રોચ્ચાર
અમેરિકાની રાજધાની વોશિંગ્ટનમાં સુપ્રીમ કોર્ટ(Supreme Court) તરફ કૂચ કરતા પહેલા હજારો સમર્થકો એકઠા થયા હતા.
America Protest : યુ.એસ.માં સેંકડો માર્ચ અને રેલીઓ યોજીને વિરોધ કરી રહેલા ગર્ભપાતના અધિકારના (Abortion rights) હિમાયતીઓએ એવી આશંકા વ્યક્ત કરી છે કે સુપ્રીમ કોર્ટ ગર્ભપાતના બંધારણીય અધિકારને રદ કરી શકે છે, જે લગભગ અડધી સદીથી અમેરિકામાં અમલમાં છે. તેમને ડર છે કે તેનાથી મહિલાઓના પ્રજનન અધિકારો પર અસર પડી શકે છે. તમને જણાવી દઈએ કે, ડ્રાફ્ટ લીક થયા બાદ લોકો ખુબ ગુસ્સે છે, જે દર્શાવે છે કે કોર્ટની રૂઢિચુસ્ત બહુમતી બેંચ ઐતિહાસિક રો વિ વેડના (Roe vs Wade) ચુકાદાને ઉથલાવી શકે છે. રિપબ્લિકન આગેવાની હેઠળનું રાજ્ય સખત પ્રતિબંધો લાદવાની તૈયારી કરી રહ્યું હોવાથી કાર્યકરોએ એક થવા પર ભાર મૂક્યો હતો.
ગર્ભાવસ્થા એ કોઈ રોગ નથી
રાજધાની વોશિંગ્ટનમાં સુપ્રીમ કોર્ટ(Supreme Court) તરફ કૂચ કરતા પહેલા હજારો સમર્થકો ભાષણ સાંભળવા માટે એકઠા થયા હતા. 64 વર્ષીય ફેડરલ ગવર્નમેન્ટ કર્મચારી સામંથા રિવર્સે કહ્યું, ‘હું માની નથી શકતી કે આ ઉંમરે પણ મારે આ મુદ્દે વિરોધ કરવો પડશે. સાથે જ તેમણે કહ્યું કે, મને નથી લાગતું કે ગર્ભપાત પર પ્રતિબંધ મૂકવાથી ગર્ભપાત બંધ થશે. આ ફક્ત મહિલાને અસુરક્ષિત બનાવશે અનેતેના કારણે મહિલાઓનું જીવન જોખમમાં પણ આવી શકે છે. ગર્ભપાત વિરોધી દેખાવકારોએ કહ્યું કે, ‘ગર્ભપાત એ આરોગ્ય સંભાળની બાબત નથી કારણ કે ગર્ભાવસ્થા એ કોઈ રોગ નથી’.
ગયા અઠવાડિયે પણ દેશના અનેક શહેરોમાં દેખાવો થયા હતા
ગયા અઠવાડિયે પણ અમેરિકાના(America) ઘણા શહેરોમાં ગર્ભપાતના અધિકારની માગણી કરતા દેખાવકારોએ રેલીઓ કાઢી હતી. વિરોધીઓએ ગર્ભપાતના સમર્થનમાં લડત ચાલુ રાખવાનું વચન આપ્યું હતું કે જેથી દેશભરની મહિલાઓ માટે ગર્ભપાત કાનૂની વિકલ્પ રહે. શિકાગો, એટલાન્ટા, હ્યુસ્ટન અને અન્ય શહેરોમાં ગર્ભપાતના અધિકારના સમર્થનમાં સેંકડો લોકો એકઠા થયા હતા. આ પ્રદર્શન એવા સમયે આવ્યું જ્યારે યુએસ સુપ્રીમ કોર્ટનો અભિપ્રાય લોકો સમક્ષ ખુલ્લો પડ્યો હતો, જે સૂચવે છે કે કોર્ટ 1973ના રો વિ વેડ કેસને રદ કરવા માટે તૈયાર છે, જેણે દેશભરમાં ગર્ભપાતને કાયદેસર બનાવ્યો હતો.
‘સ્ત્રીઓ શું કરી શકે અને શું ન કરી શકે તે વિચારવાની વાત છે’
કોર્ટ્સ મેટર ઇલિનોઇસના પ્રમુખ કેરોલ લેવિને શિકાગોમાં એક રેલી દરમિયાન જણાવ્યું હતું કે, “આ વિચારવા જેવી બાબત છે કે લોકો હજુ પણ મહિલાઓ શું કરી શકે છે અને શું ન કરી શકે તેના પર નિયંત્રણ રાખવા માંગે છે.” ઇલિનોઇસના ગવર્નર જેબી પ્રિટ્ઝકરે રેલીમાં ભાગ લીધો હતો અને આ નિર્ણયનો સખત વિરોધ કર્યો હતો.”