Iran Protest: ટીવી ચેનલ હેક, આયાતુલ્લાહ અલી ખામેનીની તસવીર બતાવીને લખ્યું- યુવાનોના લોહીથી રંગાયેલા હાથ

ઈરાનમાં (Iran) મહસા અમીનીના (Mahsa Amini) મોત બાદ વિરોધનો (Protest)કાળ ખતમ થવાનું નામ નથી લઈ રહ્યો. દેશના અનેક શહેરોમાં દેખાવો ચાલુ છે. આવી સ્થિતિમાં ઈરાનના સરકારી ટીવીને શનિવારે સાંજના સમાચાર પ્રસારણ દરમિયાન 15 સેકન્ડ માટે હેક કરવામાં આવ્યું હતું. આ દરમિયાન દેશના સર્વોચ્ચ નેતા આયાતુલ્લાહ અલી ખામેનીના ફૂટેજ પ્રસારિત કરવામાં આવ્યા હતા. હેકર્સે જ્વાળાઓથી ઘેરાયેલા ખામેનીની તસવીર ફરતી કરી હતી. આ તસવીરના કેપ્શનમાં લખ્યું છે, ‘તમારા પંજામાંથી અમારા યુવાનોનું લોહી ટપકી રહ્યું છે.’ આંતરરાષ્ટ્રીય સમાચાર અહીં વાંચો.

શનિવારે ઈરાનમાં અનેક સ્થળોએ સરકાર વિરોધી પ્રદર્શનો થયા હતા, જેમાં ઓછામાં ઓછા બે લોકો માર્યા ગયા હતા. પ્રદર્શનનું ચોથું સપ્તાહ શનિવારે શરૂ થયું. પોલીસ કસ્ટડીમાં 22 વર્ષની મહસા અમીનીના મોત બાદ ઈરાનમાં હિજાબ વિરોધી વિરોધ પ્રદર્શન થઈ રહ્યા છે. પોલીસે દેશના કડક ઈસ્લામિક ડ્રેસ કોડનું ઉલ્લંઘન કરવા બદલ અમીનીની અટકાયત કરી હતી.

સૂત્રોચ્ચાર કર્યા, હિજાબ ઉતારીને ફેંકી દીધો

વિરોધ કરી રહેલી મહિલાઓએ ફરજિયાત ધાર્મિક ડ્રેસ કોડના વિરોધમાં સરકાર વિરોધી સૂત્રોચ્ચાર કર્યા અને તેમના હિજાબ ઉતારી દીધા. કેટલાક વિસ્તારોમાં હડતાળના એલાનને કારણે વધુ નુકસાન ટાળવા વેપારીઓએ દુકાનો બંધ રાખી હતી. અમીનીના મોત બાદથી દેશભરમાં દેખાવો થઈ રહ્યા છે અને પ્રદર્શનકારીઓ સામે કડક કાર્યવાહી કરવામાં આવી રહી છે. જેમાં ડઝનેક લોકો માર્યા ગયા હોવાનો અંદાજ છે અને સેંકડો લોકોની ધરપકડ કરવામાં આવી છે.

હ્યુમન રાઇટ્સ વોચડોગ્સે જણાવ્યું હતું કે કુર્દિશ બહુમતી ઉત્તરી ક્ષેત્રના સનંદજ નગરના મુખ્ય માર્ગ પર શનિવારે કારમાં સવાર એક વ્યક્તિને ગોળી વાગી હતી. ફ્રેન્ચ સ્થિત કુર્દીસ્તાન હ્યુમન રાઈટ્સ નેટવર્ક અને હંગાવ ઓર્ગેનાઈઝેશન ફોર હ્યુમન રાઈટ્સે જણાવ્યું હતું કે જ્યારે તે વ્યક્તિએ રસ્તા પર તૈનાત સુરક્ષા દળોની સામે હોર્ન વગાડ્યો ત્યારે તેને ગોળી વાગી હતી. ઉલ્લેખનીય છે કે હોર્ન ફૂંકવું એ સવિનય આજ્ઞાભંગનો એક પ્રકાર બની ગયો છે.

હોર્ન વગાડવા બદલ મારી ગોળી

અર્ધ-સત્તાવાર ફાર્સ સમાચાર એજન્સીએ અહેવાલ આપ્યો છે કે કુર્દીસ્તાનના પોલીસ વડાએ વિરોધીઓ પર ગોળી ચલાવવાના અહેવાલોને નકારી કાઢ્યા હતા. હ્યુમન રાઇટ્સ વોચડોગ્સે જણાવ્યું હતું કે સુરક્ષા દળોએ શહેરમાં ભીડને વિખેરવા માટે ગોળીબાર કર્યો હતો, જેમાં અન્ય એક પ્રદર્શનકારી માર્યા ગયા હતા અને 10 ઘાયલ થયા હતા.

શનિવારે રાજધાની તેહરાનમાં પણ દેખાવો થયા હતા. ઈરાનના મુખ્ય એજ્યુકેશન સેન્ટર શરીફ યુનિવર્સિટી ઓફ ટેક્નોલોજીની નજીક પણ દેખાવો થયા હતા, ત્યારબાદ સત્તાવાળાઓએ આગળના આદેશ સુધી કેમ્પસ બંધ કરી દીધું છે. સોશિયલ મીડિયા પર ફરતી તસવીરો અનુસાર, ઉત્તર-પૂર્વીય શહેર મશાદમાં પણ પ્રદર્શનો યોજાયા હતા. રાષ્ટ્રપતિ ઇબ્રાહિમ રાયસીએ તેહરાનની અલ-ઝહરા યુનિવર્સિટીના વિદ્યાર્થીઓ સાથેની બેઠકમાં ફરી એકવાર આરોપ લગાવ્યો કે પ્રદર્શનો ઉશ્કેરવામાં વિદેશી દુશ્મનોનો હાથ છે. દરમિયાન, નેધરલેન્ડના હેગમાં, હજારો લોકોએ ઈરાનમાં વિરોધીઓના સમર્થનમાં સૂત્રોચ્ચાર કર્યા.