VALSAD : બરવાળા ઝેરી દારૂકાંડ બાદ પોલીસ સતર્ક, ઔદ્યોગિક કંપનીઓ પર રહેશે પોલીસની વોચ
વલસાડ જિલ્લામાં મોટી ઔદ્યોગિક વસાહતો (Industrial area) આવેલી હોવાથી જિલ્લા પોલીસ એલર્ટ મોડમાં જોવા મળી રહી છે.
બરવાળા ઝેરીદારૂ કાંડ (Botad Hooch Tragedy)બાદ ઈથેનોલ અને મિથેનોલનો ઉપયોગ કરતી કંપની પર પોલીસ (valsad police) દ્વારા વોચ રાખવામાં આવી રહી છે. વલસાડ જિલ્લામાં મોટી ઔદ્યોગિક વસાહતો (Industrial area) આવેલી હોવાથી જિલ્લા પોલીસ ખાસ એલર્ટ છે.એકલા વાપી GIDCમાં 75થી વધુ કંપનીઓ દર મહિને 15 લાખ લીટર મિથેનોલનો ઉપયોગ કરે છે. આ સ્થિતિમાં કંપનીઓમાં ઇથેનોલ-મિથેનોલના સ્ટોક પર પોલીસની નજર રહેશે. એટલું જ નહીં પોલીસની એક ટીમ મિથેનોલના(Methanol) અને ઇથેનોલનો ઉપયોગ કરતી કંપનીઓ પર વોચ રાખશે.
ગાઈડલાઈનનું પાલન કરવા પોલીસે તમામ કંપનીઓને તાકીદ કરી
કંપનીઓમાંથી આ કેમિકલની ચોરી તેમજ દુરૂપયોગ ના થાય તેને લઈ ઉદ્યોગકારો પણ એટલા જ ચિંતિત છે.સરકારની ગાઈડલાઈનનું પાલન કરવા પોલીસે તમામ કંપનીઓને તાકીદ કરી છે,તો મિથેનોલનો ઉપયોગ કરતા ઉદ્યોગકારોએ પણ ગાઈડ લાઈનના પાલનની બાંહેધરી આપી છે.વાપી ઈન્ડસ્ટ્રિઝ એસોસિએશનના પ્રમુખ કમલેશ પટેલે જણાવ્યું હતું કે,મિથેનોલને જ્યાં સ્ટોરેજ કરવામાં આવે છે ત્યાં અને તેને વહન કરતાં વાહનોમાં GPS સિસ્ટમ પણ લગાવવા આવશે. જેથી કંપનીઓમાં આ કેમિકલનું સુપરવાઈઝિંગ કરતા સ્ટાફને સ્ટોકની જાણકારી રહે.