OPDના સમયમાં ફેરફારનો અમલ કોણે કર્યો ? સરકારી હોસ્પિટલ્સના રિયાલીટી ચેકમાં જોવા મળ્યુ કઇક આવુ, જુઓ VIDEO
રાજ્ય સરકારના આરોગ્ય વિભાગે સરકારી હોસ્પિટલોમાં (Government Hospitals) ઓપીડીનો સમય 8 કલાક કરવાની જાહેરાત કરી દીધી છે. આ જાહેરાતનો અમલ શરૂ થયો કે નહીં ? એ જાણવા ટીવી નાઈને રાજકોટ (Rajkot) અને વડોદરામાં (Vadodara) રીયાલિટી ચેક કર્યું હતુ.
તાજેતરમાં જ સરકાર દ્વારા એવી જાહેરાત કરવામાં આવી હતી કે ગુજરાત સરકારની (Gujarat Govt) આરોગ્ય સંસ્થાઓમાં હવે દર્દીઓ માટે સવાર ઉપરાંત સાંજની પણ ઓપીડી કરવામાં આવશે. શનિવારે રાજ્ય સરકારના આરોગ્ય વિભાગે સરકારી હોસ્પિટલોમાં (Government Hospitals) ઓપીડીનો સમય 6 ને બદલે 8 કલાક કરવાની જાહેરાત કરી દીધી છે. પરંતુ એ જાહેરાતનો અમલ શરૂ થયો કે નહીં ? એ જાણવા ટીવી નાઈને રાજકોટ (Rajkot) અને વડોદરામાં (Vadodara) રીયાલિટી ચેક કર્યું તો શું જાણવા મળ્યું ? આવો તમને જણાવીએ.
OPDના સમય અંગે શું છે પરિપત્ર ?
- OPD માટેના સમય અને દિવસોમાં ફેરફાર
- હાલ સવારે 9થી 1 અને સાંજે 3થી 5ની OPD હતી
- હવે 8 કલાકની OPD રહેશે
- સાંજે 3થી 5ને બદલે 3થી 7 OPDનો સમય કરાયો
- સરકારની તમામ PHC, CHC, મેડિકલ કોલેજ હોસ્પિટલ કાર્યરત
- અલગ લાઈન અને ખાસ OPD શરૂ કરાશે
- સ્ટાફની અછત હશે તો નવો સ્ટાફ લેવામાં આવશે
- 60 વર્ષથી વધુને દર્દીઓ માટે ખાસ વ્યવસ્થા ઉભી કરાશે
શું છે વડોદરાની સરકારી હોસ્પિટલ્સની સ્થિતિ ?
વડોદરા આરોગ્ય વિભાગે સરકારી હોસ્પિટલમાં ઓપીડીના સમયમાં વધારો કર્યો છે. હવે સાંજની ઓપીડીનો સમય 4થી 6ને બદલે 4થી 8નો રહેશે. તેમજ રવિવારે રજાના દિવસે પણ સવારે 9થી 1 ઓપીડી રહેશે. આ પરિપત્ર આવતાં જ સિવિલ હોસ્પિટલે પણ હુકમ અમલી કરવા સૂચના આપી હતી પણ વડોદરામાં તો સરકારે કરેલી જાહેરાતની અસર શેઠની શિખામણ ઝાંપા સુધી જેવી જ લાગી રહી છે.
હવે આટલા ફેરફાર માટે હોસ્પિટલો કેટલી તૈયાર છે એ એક મોટો સવાલ છે. કેમકે વડોદરાની SSG હોસ્પિટલમાં Tv9એ જ્યારે રિયાલિટી ચેક કર્યું તો સરકારી હોસ્પિટલના તબીબો આરોગ્ય વિભાગની જાહેરાતને ઘોળીને પી ગયા હોય તેવી સ્થિતિ જોવા મળી. Tv9ના રિયાલિટી ચેકમાં OPDમાં મોટા ભાગના વિભાગોમાં તબીબો ગેરહાજર જોવા મળ્યા. તબીબોની ગેરહાજરી અંગે Tv9 દ્વારા જાણવાનો પ્રયાસ કરવામાં આવ્યો ત્યારે હોસ્પિટલનો સ્ટાફ ભાગતો નજરે ચડ્યો.
રાજકોટમાં સરકારની સૂચનાનો અમલ
આ તરફ રાજકોટ સિવિલમાં જરા અલગ સ્થિતિ જોવા મળી. અહીં સરકારની સૂચના પ્રમાણે OPDમાં તમામ વિભાગમાં તબીબોએ હાજર રહીને દર્દીઓની સારવાર કરી. હવેથી રાજકોટ સિવિલમાં દર રવિવારે સવારે 9 વાગ્યાથી બપોરે 1 વાગ્યા સુધી OPD ખુલ્લી રહેશે. જોકે સરકારની જાહેરાત અંગે મર્યાદિત જાણકારી હોવાથી રાજકોટ સિવિલમાં સામાન્ય કરતા ઓછી સંખ્યામાં દર્દીઓ સારવાર માટે પહોંચ્યા હતા.
આમ અલગ અલગ શહેરોમાં અલગ અલગ સ્થિતિ છે. જોકે દર્દીઓનું કહેવું છે કે, હાલ જે ઓપીડીનો સમય છે તેમાં પણ ઘણા તબીબો ગુટલી મારી દેતા હોય છે અને જુનિયર ડોક્ટર પર પણ જવાબદારી નાખી દેતા હોય છે. તેથી તેના પર કામનું ભારણ વધે છે. તેવામાં વધુ 2 કલાક વધારાતા કેટલીક હોસ્પિટલોમાં તો ડોક્ટર્સ આ નવા પરિપત્રનો વિરોધ પણ કરી રહ્યા છે. ત્યારે દર્દીઓને આ નવા પરિપત્રથી કેટલો ફાયદો થશે એ આવનારા સમયમાં ખબર પડશે.
(વીથ ઇનપુટ- વડોદરાથી ધર્મેન્દ્ર કપાસી અને રાજકોટથી રોનક મજેઠીયા)
Latest News Updates
