રાજકોટમાં મેઘરાજાની તોફાની બેટીંગ, ગાજવીજ અને ભારે પવનના કારણે પાર્ક કરેલા વાહનો પડી ગયા, રાજમાર્ગો પર પાણી ફરી વળ્યા
હવામાન વિભાગ (IMD) દ્વારા રાજ્યમાં આગામી પાંચ દિવસ સારા વરસાદની આગાહી કરવામાં આવી છે. દક્ષિણ ગુજરાતમાં પાંચ દિવસ ભારે વરસાદ (Heavy Rain) રહેશે. જ્યારે સૌરાષ્ટ્રમાં એક દિવસ સારા વરસાદની આગાહી કરવામાં આવી છે.
રાજકોટમાં (Rajkot Heavy Rain) આજ બપોર બાદ અચાનક વાતાવરણમાં પલ્ટો જોવા મળ્યો હતો. બપોર બાદ વાતાવરણ ગાઢ બન્યું હતું અને વાજળીના કડાકા તેમજ જોરદાર પવન સાથે મેઘરાજાએ જોરદાર બેટીંગ શરૂ કરી હતી. વીજળીના અવાજથી બિલ્ડીંગના કાચ ધ્રુજી ઉઠ્યા હતા. તો ભારે પવનને કારણે રાજકોટની સોપાન હાઈટ્સ બિલ્ડીંગમાં પાર્ક કરેલા વાહનો પડી જવાની ઘટના બની હતી. જોકે, આવા તોફાની વરસાદને કારણે જાનહાનીના સમાચાર સામે આવ્યા નથી.
રાજમાર્ગો ફેરવાયા નદીમાં, અનેક વૃક્ષો ધરાશાયી
ઉલ્લેખનીય છે કે, અસહ્ય બફારાને કારણે લોકો પણ અકળાઈ ઉઠ્યા હતા. ત્યારે બપોર બાદ વાતાવરણમાં પલ્ટો જોવા મળતા અને વરસાદ આવતા લોકોને પણ રાહત મળી છે. ધોધમાર વરસાદને કારણે શહેરના રાજમાર્ગો પર બે-બે ફૂટ જેટલા પાણી ફરી વળ્યા હતા. તેમજ પાણી ભરાવાને કારણે લોકોને હાલાકિ થઈ હતી તેમજ ભારે પવન હોવાથી અનેક વૃક્ષો પણ ધરાશાયી થયા હતા. જેને પગલે ફાયર બ્રિગેડની ટીમ પણ કામે લાગી છે.
આજે રવિવાર રજાનો દિવસ હોય બાળકો પણ વરસાદના કારણે ઝુમી ઉઠ્યા હતા. પરંતુ દિવસે પણ ખાસ્સું અંધારૂ થયું હોવાથી અને વિજળીના ચમકારાને લીધે થોડો ડર પણ અનુભવ્યો હતો. લગભગ દોઢ ઈંચ કરતા પણ વધારે વરસાદ પડી ગયો હતો.
હવામાન વિભાગે કરી હતી આગાહી
ઉલ્લેખનીય છે હવામાન વિભાગ (IMD) દ્વારા રાજ્યમાં આગામી પાંચ દિવસ સારા વરસાદની આગાહી કરવામાં આવી છે. દક્ષિણ ગુજરાતમાં પાંચ દિવસ ભારે વરસાદ રહેશે. જ્યારે સૌરાષ્ટ્રમાં એક દિવસ સારા વરસાદની આગાહી કરવામાં આવી છે. દક્ષિણ ગુજરાતમાં સુરત, વલસાડ, નવસારી, તાપી અને ડાંગમાં વરસાદ પડી શકે છે. જ્યારે, સૌરાષ્ટ્રમાં જૂનાગઢ, રાજકોટ, પોરબંદર, અમરેલી અને ભાવનગરમાં વરસાદની શક્યતા છે.
ભારે વરસાદની આગાહી વચ્ચે દક્ષિણ ગુજરાતના માછીમારોને એલર્ટ રહેવા માટે પણ સૂચન અપાઈ છે. સામાન્ય રીતે જૂન મહિનામાં 3 ઈંચ જેટલો વરસાદ હોવો જોઈએ. પરંતુ, આ વર્ષે જૂનમાં સરેરાશ દોઢ ઈંચ જેટલો વરસાદ નોંધાયો છે. મહત્વનું છે કે સૌરાષ્ટ્રમાં મેઘમહેર યથાવત છે. ગઈકાલે પણ અમરેલી, રાજકોટ અને જૂનાગઢ પર મેઘરાજા મહેરબાન રહ્યા હતા.
સૌથી વધુ જૂનાગઢ, વિસાવદરમાં પોણા બે ઈંચ વરસાદ પડ્યો. તો માળિયાહાટીમાં પણ મેઘરાજા મન મુકીને વરસ્યા. આ ઉપરાંત માણાવદરમાં પણ દોઢ ઈંચ વરસાદ વરસ્યો. તો રાજકોટના ઉપલેટામાં દોઢ ઈંચ અને ધોરાજીમાં અડધો ઈંચ વરસાદ વરસ્યો. તો આ તરફ અમરેલીના લાઠીમાં એક ઈંચ અને બગસરામાં અડધો ઈંચ વરસાદ પડ્યો હતો.
Latest News Updates
