Navsari: નવસારી નગરપાલિકાની કંગાળ સ્થિતિ, આટલી રકમનું છે દેવું

બહુજન સુખાય બહુજન હિતાય કામગીરી પાલિકાઓ પોતાના શહેરીજનો માટે કરતી હોય છે, પરંતુ નવસારી (Navsari) નગરપાલિકાનું શાસન અવળી દિશામાં જઇ રહ્યું હોય તેવી સ્થિતિ નિર્માણ થઇ છે. શહેરીજનોને મધુર જળ યોજના હેઠળ 20 વર્ષથી સિંચાઇ વિભાગને પાણીના પૈસા ન ચૂકવતાં ચાલીસ કરોડ જેટલી મોટી રકમનું દેવું થઈ જતાં પાલિકા દેવાદાર બની છે.

પાયાની જરૂરિયાત ગણાતી પીવાના પાણીની સુવિધાને લઇ પાલિકાના શાસકોએ ભાંગરો વાટયો હોવાના કારણે 40 કરોડ રૂપિયા જેટલું દેવું થઈ ગયું છે. જેની માંડવાળ માટે પાલિકાએ સેટલમેન્ટ કરી દેવું ચૂકવવા માટે રાજ્ય સરકારની મધ્યસ્થીમાં રસ્તો કાઢ્યો હતો, પરંતુ પાલિકા 14 કરોડ જેટલી મોટી રકમ ભરવામાં નિષ્ફળ ગઈ હતી. પાલિકાના સિંચાઇ પેટા સિંચાઇ વિભાગને જેમાં 26 કરોડ જેટલી મોટી રકમ વ્યાજ અને વિવિધ પેનલ્ટીને લઈને વધી ગયા છે.

પાલિકાએ સેટલમેન્ટમાં એક સાથે 14 કરોડ ભરી સમગ્ર દેવું માફ થાય તેવી યોજના ઘડી કાઢી હતી, પરંતુ પાલિકાના શાસકો 14 કરોડના બદલે માત્ર અઢી કરોડ ભરી શક્યા છે જેને લઇ ફરીથી પાલિકાએ 40 કરોડ જેટલું દેવું ભરપાઈ કરવું પડે એવા સંજોગો ઊભા થયા છે. શહેરીજનોને સિંચાઇ વિભાગમાંથી પાણી લાવી તળાવમાં સંગ્રહ કરી પાણી ઘરે ઘરે પહોંચાડવામાં આવે છે. દર વર્ષે કનેક્શન દીઠ 800 જેટલી રકમ વસૂલવા છતાં દેવું વધી જતા શહેરીજનો પણ પાલિકાના શાસન સામે અને વહીવટ સામે સવાલો ઉભા કરી રહ્યા છે.