રાજ્યમાં સારા વરસાદની સ્થિતિ વચ્ચે 35 જળાશયો 100 ટકા ભરાયા, મુખ્ય 207 જળપરિયોજનામાં 60 ટકાથી વધુ જળસંગ્રહ
રાજ્યમાં સારા વરસાદની સ્થિતિ વચ્ચે કુલ 35 જળાશયો છલોછલ (Dam Overflaw) ભરાયા છે. રાજ્યના 35 ડેમોમાં 100 ટકાથી વધુ જળસંગ્રહ થયો છે. જ્યારે સરદાર સરોવર પરિયોજનામાં 63 ટકાથી વધુ જળસંગ્રહ થયો છે.
રાજ્યમાં આ વર્ષે સારો વરસાદ (Good Rain) પડી રહ્યો છે. ચોમાસાની ઋતુને હજુ એક મહિનો થયો છે ત્યા રાજ્યના 35 જળાશયો (Dam)માં 100 ટકા જેટલી પાણીની આવક થઈ ગઈ છે. આ ડેમોમાં કચ્છ (Kutch)ના અબડાસાનો જાંગડિયા ડેમ, બેરાચીયા ડેમ અને મીતી ડેમ 100 ટકા ભરાઈ ગયા છે. જ્યારે મુન્દ્રાનો ગજોદ અને નખત્રાણાનો ગજાસર ડેમ પણ સંપૂર્ણ ભરાઈ ગયો છે.
નવસારી (Navsari)ના વાંસદા તાલુકામાં આવેલ જૂજ ડેમમાં પણ સરેરાશ 100 ટકા જેટલી પાણીની આવક થઈ છે અને ડેમ છલોછલની સ્થિતિમાં આવી ગયો છે. તો વાંસદામાં આવેલ કેલિયા ડેમમાં પણ 100 ટકા પાણીની આવક થઈ છે.
ભરૂચના ઝઘડિયા તાલુકામાં આવેલા ધોલી ડેમમાં પણ 100 ટકા પાણીની આવક થઈ છે. સૌરાષ્ટ્રના જળાશયોની જો વાત કરીએ તો જામનગરનો વગાડિયા ડેમ 100 ટકા ભરાઈ ગયો છે. જ્યારે પોરબંદરમાં આવેલા સોરઠી ડેમ પણ 100 ટકા ભરાઈ ગયો છે.
રાજ્યમાં 42 ડેમ હાઈએલર્ટ પર
હાઈએલર્ટની સ્થિતિમાં હોય તેવા 42 ડેમ છે, જેમા 90 ટકા પાણીની આવક થઈ ગઈ છે. તો વધુ 8 ડેમને એલર્ટ પર રખાયા છે જેમા 80 ટકા સુધી પાણી પહોંચી ગયુ છે. ઉપરાંત રાજ્યમાં જે ડેમોમાં 70 ટકા પાણીની આવક થઈ છે તેવા 14 ડેમ છે. તો આ સાથે સામાન્ય સ્થિતિમાં જેમાં 60 ટકા જેટલી પાણીની આવક થઈ હોય તેવા 131 ડેમ છે.
નર્મદા ડેમની સપાટીમાં ધરખમ વધારો
નર્મદા ડેમની જો વાત કરીએ તો નર્મદાની જળસપાટી 125.79 મીટરે પહોંચી ગઈ છે. ડેમમાં કુલ 2 લાખ 92 હજાર ક્યુસેક પાણીની આવક થઈ છે. ડેમમાં કુલ પાણી સ્ટોરેજ ક્ષમતા 1820 મિલિયન ક્યુબિક મીટર છે. છેલ્લા 24 કલાકમાં નર્મદા ડેમમાં 1.75 મીટરનો વધારો નોંધાયો છે. દક્ષિણ ગુજરાતમાં સતત વરસાદને પગલે ડેમની સપાટીમાં સતત વધારો થઈ રહ્યો છે.
