5 જાન્યુઆરીના લેટેસ્ટ ન્યૂઝ : ઢાકામાં બદમાશોએ એક્સપ્રેસ ટ્રેનમાં આગ લગાવી, પાંચના મોત

NCP શરદ પવાર જૂથના નેતા જિતેન્દ્ર આવ્હાડ વિરુદ્ધ મુંબઈમાં કેસ

ભગવાન રામને માંસાહારી હોવાના કથિત નિવેદન બદલ NCP શરદ પવાર જૂથના ધારાસભ્ય જીતેન્દ્ર આવ્હાડ વિરુદ્ધ MIDC પોલીસ સ્ટેશનમાં કેસ નોંધવામાં આવ્યો છે. મુંબઈ પોલીસે આ માહિતી આપી છે.

અમદાવાદના શાહીબાગમાં એક મકાનની છત ધરાશાયી

અમદાવાદના શાહીબાગ વિસ્તારમાં એક મકાનની છત ધરાશાયી થવાની ઘટના સામે આવી છે. શાહીબાગના નમસ્તે સર્કલ પાસે આવેલા એમ.જે. હાઉસના મકાનની છત ધરાશાયી થઇ છે. આ ઘટનામાં મકાનની છતના કાટમાળમાં 6 લોકો દટાઇ ગયા હોવાનું સામે આવ્યું છે. ઘટના બાદ લોકોમાં અફરતાફરીનો માહોલ સર્જાયો હતો.

જુનાગઢ: ભીખારીના સ્વાંગમાં મહિલાએ ઘરફોડ ચોરીને આપ્યો અંજામ

જુનાગઢમાં બગડુ ગામે થયેલી ચોરીનો ભેદ ઉકેલાયો છે. ભીખારીના વેશમાં ચોરી કરતી મહિલા 6 લાખની ચોરીને અંજામ આપી ચુકી છે. મહિલા ભીખારીના વેશમાં પહેલા રેકી કરતી અને ત્યારબાદ ચોરીને અંજામ આપતી હતી. 2012થી અત્યાર સુધીમાં 12 થી વધુ ગુના આચરી ચુકી છે.

અલકા લાંબા મહિલા કોંગ્રેસ અને વરુણ ચૌધરીની NSUI પ્રમુખ તરીકે નિમણૂક

કોંગ્રેસ પાર્ટીએ અલકા લાંબાને મહિલા કોંગ્રેસના પ્રમુખ તરીકે નિયુક્ત કર્યા છે. સાથે જ વરુણ ચૌધરીને NSUI પ્રમુખ બનાવવામાં આવ્યા છે. પાર્ટીએ આ અંગે આદેશ પણ જારી કર્યો હતો

તેલંગાણામાં દર્દનાક અકસ્માતમાં 6 લોકોના મોત

તેલંગાણાના મહબૂબનગર જિલ્લાના બાલાનગર વિસ્તારમાં, એક ઝડપી ડીસીએમ ટ્રકે બાઇક અને ઓટો રિક્ષાને ટક્કર મારી, તેમાં સવાર 6 લોકોના મોત થયા, બે લોકો ઘાયલ થયા.

ગુજરાતના પૂર્વ કૃષિ પ્રધાનને તેમના પુત્ર અને પૌત્રે માર્યો માર, મારી નાખવાની આપી ધમકી

ગુજરાતના પૂર્વ કૃષિ પ્રધાન કરસનજી ઠાકોરે, તેમના પુત્ર અને પૌત્ર સહીત છ વિરુદ્ધ માર માર્યાની અને જાનથી મારી નાખવાની ધમકી આપ્યાની ફરિયાદ નોંધાવી છે. કડીના ચંદ્રાસણ ગામે ખેતરમાં કરસનજી હતા ત્યારે તેમના પુત્ર અને પૌત્ર સહિતના લોકોએ જમીન વહેંચણીના મુદ્દે માથાકુટ કરીને માર માર્યો હતો. કરસનજી ઠાકોરે એમ પણ જણાવ્યું છે કે, જમીનની વહેંચણી કરી આપો નહિ તો ટ્રેકટર ચડાવી જાનથી મારી નાખવાની ધમકી આપી છે.

ભારતે ટોસ જીતીને ઓસ્ટ્રેલિયાને બેટિંગમાં ઉતાર્યુ

ભારતે પ્રથમ T20Iમાં ટોસ જીતીને ઓસ્ટ્રેલિયા સામે બોલિંગ કરવાનું પસંદ કર્યું

Toss news from Mumbai

India have opted to bowl against Australia in the first T20I #INDvAUS pic.twitter.com/3nx8q4i4wh

— ICC (@ICC) January 5, 2024

મણિનગરનુ દંપતિ સિંધુભવન રોડ પર દારૂની હોમ ડિલિવરી કરતા ઝડપાયુ

અમદાવાદના મણિનગર વિસ્તારમાં રહેતુ એક દંપતિ, સિંધુભવન રોડ પર દારુની હોમ ડિલિવરી કરતા પોલીસના હાથે ઝડપાયું છે. બોડકદેવ પોલીસે, દંપતિ પાસેથી દારૂની બોટલ કબજે કરીને બન્નેની ધરપકડ કરી છે.

પાકિસ્તાનમાં અહલે સુન્નત વાલ જમાતના પ્રવક્તાની ગોળી મારીને કરાઈ હત્યા

પાકિસ્તાનની સુન્ની ઉલેમા કાઉન્સિલના સેન્ટ્રલ ડેપ્યુટી જનરલ સેક્રેટરી અને અહલે સુન્નત વાલ જમાતના પ્રવક્તા અલ્લામા મસૂદ-ઉ-રહેમાન ઉસ્માનીની ઈસ્લામાબાદના ગોરી ટાઉનમાં ગોળી મારીને હત્યા કરવામાં આવી છે.

સ્વાતિ માલીવાલે દિલ્હી મહિલા આયોગના અધ્યક્ષ પદ પરથી રાજીનામું આપી દીધું

સ્વાતિ માલીવાલે દિલ્હી મહિલા આયોગના અધ્યક્ષ પદ પરથી રાજીનામું આપી દીધું છે. આમ આદમી પાર્ટીએ તેમને રાજ્યસભાની ચૂંટણી માટે ઉમેદવાર બનાવ્યા હતા, જેના પછી તેમણે રાજીનામું આપવું પડ્યું હતું.

જ્ઞાનવાપી સર્વે રિપોર્ટ અંગેનો નિર્ણય ફરી મોકૂફ

જ્ઞાનવાપી અંગે ASI સર્વે રિપોર્ટ વાદી મહિલા અને તેમના વકીલને આપવાની માંગણી કરતી અરજી પરનો નિર્ણય ફરી મોકૂફ રાખવામાં આવ્યો છે. હવે શનિવારે નિર્ણય આવે તેવી શક્યતા છે.

બંગાળમાં ED ટીમ પર થયેલા હુમલાની NIA તપાસ કરાવે – ભાજપે ઉઠાવી માંગ

પશ્ચિમ બંગાળમાં ED ટીમ પર થયેલા હુમલા પર ભાજપના સાંસદ લોકેટ ચેટર્જીએ કહ્યું કે આજનો દિવસ પશ્ચિમ બંગાળ માટે કાળો દિવસ છે. ટીએમસી નેતા શેખ શાહજહાંના ગુંડાઓએ ED ટીમ પર હુમલો કર્યો. તેઓ (TMC) ભ્રષ્ટાચાર કરશે અને જો ED, CBIની ટીમો તેની તપાસ કરવા ત્યાં જશે તો તેઓ તેમના પર હુમલો કરશે. જનતા તેનો જવાબ 2024માં આપશે. NIAએ આ ઘટનાની તપાસ કરવી જોઈએ અને આરોપીઓની ધરપકડ કરવી જોઈએ.

થરાદ-ડીસા હાઇવે પર ગમખ્વાર અકસ્માત, 4 લોકોના મોત

બનાસકાંઠામાં વધુ એક અકસ્માતની ઘટના સામે આવી છે. થરાદ- ડીસા હાઈવે પર ખોરડાં નજીક અકસ્માત થયો છે. જેમાં 4 લોકોના ઘટના સ્થળે મોત થયા છે. તો મળતી માહિતી અનુસાર કાર અને ટ્રક વચ્ચે અકસ્માત થયો હતો. કારમાં સવાર પરિવારના સભ્યોના મોત થયું છે.

વલસાડમાં બોમ્બ બ્લાસ્ટની ધમકીથી દોડધામ, સાયન્સ સિટી મ્યુઝિયમની હેડ ઓફિસને ઉડાવી દેવાની ધમકી

• વલસાડમાં સાયન્સ સિટી મ્યુઝિયમની હેડ ઓફિસને ઉડાવી દેવાનો આવ્યો મેલ
• કલકત્તા ખાતે આવેલી ઓફિસને મેલ બાદ વધી સતર્કતા
• વલસાડમાં આવેલું સાયન્સ સિટી મ્યુઝિયમ ખાલી કરાયું
• ધરમપુરના મ્યુઝિયમમાં પોલીસની તપાસ
• મ્યુઝિયમની આજુબાજુનો વિસ્તાર ખાલી કરાયો

મુકેશ અંબાણીને પાછળ છોડી ગૌતમ અદાણી બન્યા એશિયાના સૌથી અમીર વ્યક્તિ

2024નુ વર્ષ ગૌતમ અદાણી માટે શુભ નીવડે તેવુ લાગી રહ્યું છે. વર્ષની શરૂઆતમાં જ સુપ્રીમ કોર્ટમાંથી અદાણીને હિંડનબર્ગ કેસમાં મોટી રાહત આપી હતી. ત્યાર બાદ અદાણી જૂથના શેરના ભાવ રોકેટની ઝડપે વધી રહ્યાં છે. જેના પગલે, અદાણીની સંપતિમાં વધારો થવા પામ્યો છે.

કેબિનેટે અયોધ્યા એરપોર્ટને આંતરરાષ્ટ્રીય એરપોર્ટ તરીકે મંજૂરી આપી

વડાપ્રધાન નરેન્દ્ર મોદીની અધ્યક્ષતામાં કેન્દ્રીય મંત્રીમંડળે અયોધ્યા એરપોર્ટને આંતરરાષ્ટ્રીય એરપોર્ટ તરીકે જાહેર કરવા અને તેને “મહર્ષિ વાલ્મીકી આંતરરાષ્ટ્રીય એરપોર્ટ, અયોધ્યાધામ” નામ આપવાના પ્રસ્તાવને મંજૂરી આપી દીધી છે. અયોધ્યાની આર્થિક ક્ષમતા અને વૈશ્વિક તીર્થ સ્થળ તરીકે તેના મહત્વને સમજવા અને વિદેશી તીર્થયાત્રીઓ અને પ્રવાસીઓ માટે દરવાજા ખોલવા માટે અયોધ્યા એરપોર્ટને આંતરરાષ્ટ્રીય દરજ્જો આપવો મહત્વપૂર્ણ છે.

અમદાવાદના સરદાર સ્મૃતિ સ્મારકને બોમ્બથી ઉડાવી દેવાની ધમકી મળી

અમદાવાદમાં શાહીબાગમાં આવેલા સરદાર સ્મૃતિ સ્મારકને બોમ્બથી ઉડાવી દેવાની ધમકી મળી છે. શાહીબાગના સરદાર સ્મૃતિ સ્મારક ઓફિસમાં ઇમેઇલ દ્વારા આ ધમકી આપવામાં આવી છે. આ ધમકી મળતા જ પોલીસ સહિતની ટીમ દોડતી થઇ ગઇ છે. સમગ્ર મામલે તપાસ શરુ કરવામાં આવી છે.

સુપ્રીમ કોર્ટે પટના હાઈકોર્ટના “બળજબરીથી લગ્ન”ને રદ કરવાના આદેશ પર રોક લગાવી

સુપ્રીમ કોર્ટે પટના હાઈકોર્ટના “બળજબરીથી લગ્ન”ને રદ કરવાના આદેશ પર રોક લગાવી દીધી છે. સુપ્રીમ કોર્ટે કહ્યું કે તે આ અંગે નોટિસ જારી કરશે. નિર્ણયની કામગીરી અને અમલીકરણ આગામી આદેશો સુધી હોલ્ડ પર રહેશે.

સોમાલિયાના દરિયાકાંઠે જહાજનું અપહરણ, ક્રૂમાં 15 ભારતીયો સવાર હતા

સોમાલિયાના દરિયાકાંઠેથી એક મોટા સમાચાર સામે આવ્યા છે પ્રાપ્ત માહિતી અનુસાર, ત્યાં એક જહાજને હાઇજેક કરવામાં આવ્યું છે જેમાં ક્રૂમાં લગભગ 15 ભારતીય નાગરિકો સામેલ છે. ભારતીય નૌકાદળ અપહરણ કરાયેલા જહાજ ‘MV લીલા નોરફોક’ પર ચાંપતી નજર રાખી રહ્યું છે.

અમેરિકામાં ખાલિસ્તાનીઓએ ફરી હિંદુ મંદિર પર હુમલો કર્યો, 14 દિવસમાં બીજી ઘટના

અમેરિકામાં ખાલિસ્તાનીઓએ ફરી હિન્દુ મંદિર પર હુમલો કર્યો છે. 4 દિવસમાં આ બીજી ઘટના પ્રકાશમાં આવી છે. શેરાવલી મા મંદિરના બોર્ડ પર કાળું નાણું લગાવવામાં આવ્યું હતું અને ત્યાં ખાલિસ્તાન ઝિંદાબાદના નારા લખવામાં આવ્યા હતા. તેમજ વડાપ્રધાન નરેન્દ્ર મોદી માટે અપશબ્દો લખવામાં આવ્યા હતા.

5 કરોડ રૂપિયા કેશ, ગેરકાયદેસર વિદેશી હથિયારો, ED એ INLD નેતા દિલબાગ સિંહના ઘરે પાડ્યા દરોડા

એન્ફોર્સમેન્ટ ડિરેક્ટોરેટ (ED)ની ટીમે INLD નેતા અને પૂર્વ ધારાસભ્ય દિલબાગ સિંહના ઘર પર દરોડા પાડ્યા હતા. આ દરમિયાન EDએ દિલબાગ સિંહના ઘરેથી કુબેરનો ખજાનો કબજે કર્યો હતો.સર્ચ ઓપરેશન દરમિયાન EDએ કરોડો રૂપિયાનો વિદેશી દારૂ પણ જપ્ત કર્યો છે. માહિતી અનુસાર, દિલબાગ સિંહ અને તેના સહયોગીના પરિસરમાંથી 5 કરોડ રૂપિયાની રોકડ મળી આવી છે. ચલણી નોટોની વાડ ઉપરાંત ગેરકાયદેસર વિદેશી બનાવટના હથિયારો, 300 કારતૂસ, 100થી વધુ દારૂની બોટલો અને દેશ-વિદેશમાં અનેક મિલકતો સહિત અન્ય સામગ્રી મળી આવી છે.

જમ્મુ કાશ્મીર: શોપિયાંમાં આતંકવાદીઓ અને સુરક્ષા દળો વચ્ચે એન્કાઉન્ટર

જમ્મુ-કાશ્મીરના શોપિયાં જિલ્લામાં શુક્રવારે પણ સુરક્ષાદળો અને આતંકવાદીઓ વચ્ચે અથડામણ ચાલુ છે. પોલીસે આ માહિતી આપી હતી. એક પોલીસ અધિકારીએ જણાવ્યું કે દક્ષિણ કાશ્મીર જિલ્લાના ચોટીગામ વિસ્તારમાં આતંકવાદીઓની હાજરીની બાતમી મળ્યા બાદ સુરક્ષા દળોએ સવારે વિસ્તારને ઘેરી લીધો અને સર્ચ ઓપરેશન શરૂ કર્યું.

સોનીપતના કોંગ્રેસના ધારાસભ્ય સુરેન્દ્ર પવારના ઘરે EDના દરોડા

સોનીપતથી કોંગ્રેસના ધારાસભ્ય સુરેન્દ્ર પંવારના ઘરે છેલ્લા 24 કલાકથી EDના દરોડા ચાલુ છે. ઈડીના અધિકારીઓ ગેરકાયદે માઈનિંગ અને ઈ-કન્વેયન્સ કૌભાંડ સંબંધિત કેસમાં પંવાર પાસેથી માહિતી એકત્ર કરી રહ્યા છે. ગઈકાલે સવારે 8 વાગ્યે EDના અધિકારીઓ અને CISFના જવાનો 5 અલગ-અલગ વાહનોમાં આવ્યા હતા.

ગોળીઓના અવાજથી ધણધણી ઉઠી અમેરિકાની સ્કૂલ, એકનું મોત, અનેક ઘાયલ

અમેરિકામાં હજુ તો નાતાલ અને નવા વર્ષની રજાઓ બાદ શાળા ખુલી જ છે, ત્યાં પહેલા જ દિવસે ગોળીબારની ઘટનાએ સૌ કોઇને ચોંકાવી દીધા છે. થોડા સમય બાદ અમેરિકામાં રાષ્ટ્રપતિ પદની ઉમેદવારી માટેની પ્રથમ હરીફાઈ થવા જઈ રહી છે, આ દરમિયાન જ શાળામાં ગોળીબારની ઘટના બની છે.આ ઘટના અમેરિકન રાજ્ય આયોવાની એક હાઈસ્કૂલમાં બની છે, જ્યાં એક વ્યક્તિનું મોત થયું છે અને ઘણા લોકોના મોતની આશંકા છે.

દેશના લાખો ખેડૂતો માટે સારા દિવસો આવશે, સરકારે નવું પોર્ટલ લોન્ચ કર્યું

દેશના લાખો ખેડૂતો માટે સારા દિવસો ટૂંક સમયમાં આવવાના છે. કેન્દ્રીય સહકાર મંત્રી અમિત શાહે ગુરુવારે તુવેર દાળની ખરીદી માટે રચાયેલ એક પોર્ટલ લોન્ચ કર્યું અને કહ્યું કે આપણે ડિસેમ્બર 2027 સુધીમાં દેશને કઠોળમાં આત્મનિર્ભર બનાવવો જોઈએ. તેમણે જાન્યુઆરી 2028થી દાળની આયાત બંધ કરવાની પણ વાત કરી હતી. આ પ્લેટફોર્મ પર, ખેડૂતો તેમની પેદાશો નાફેડ અને એનસીસીએફને વેચી શકે છે, જ્યાં ખેડૂતો તેમની નોંધણી કરાવી શકે છે અને લઘુત્તમ ટેકાના ભાવ અથવા બજાર કિંમતે તેમની ઉપજ વેચી શકે છે.

Interim Budget 2024: સરકાર સામાન્ય નહીં પણ વચગાળાનું બજેટ જાહેર કરશે, જાણો આ બજેટમાં શું અલગ હોય છે?

Interim Budget 2024: આગામી મહિને બજેટ રજૂ થવાનું છે. જો કે, ફેબ્રુઆરીમાં જાહેરાતને લઈને જે ઉત્સાહ અને અપેક્ષાઓ છે તે સ્તરે નથી જે ગત બજેટ દરમિયાન હતી. આ પાછળનું કારણ સ્પષ્ટ છે કારણ કે આ વચગાળાનું બજેટ છે. આ બજેટનો મુખ્ય હેતુ નવી સરકારની રચના સુધી જરૂરી ખર્ચની વ્યવસ્થા કરવાનો છે.

શોપિયન જિલ્લાના ચોટીગામ વિસ્તારમાં એન્કાઉન્ટર શરૂ

શોપિયન જિલ્લાના ચોટીગામ વિસ્તારમાં એન્કાઉન્ટર શરૂ થયું છે. શોપિયા પોલીસ, આર્મી અને સીઆરપીએફ ફરજ પર છે. વધુ વિગતો નીચે મુજબ રહેશે: કાશ્મીર ઝોન પોલીસ

An encounter has started in the Chotigam area of Shopian district. Shopian Police, Army and CRPF are on the job. Further details shall follow: Kashmir Zone Police

— ANI (@ANI) January 4, 2024

પીએમ મોદીને મળ્યા બાદ તમિલનાડુના મંત્રી ઉધયનિધિ સ્ટાલિન ચેન્નાઈ પહોંચ્યા

દિલ્હીમાં વડાપ્રધાન મોદીને મળ્યા બાદ તમિલનાડુના મંત્રી ઉધયનિધિ સ્ટાલિન ચેન્નાઈ એરપોર્ટ પહોંચ્યા હતા.

પાકિસ્તાનઃ ક્રિકેટ ‘બેટ’ મામલે આજે SCમાં સુનાવણી

પાકિસ્તાનમાં ચૂંટણીનો માહોલ છે, પરંતુ જેલમાં બંધ પૂર્વ વડાપ્રધાન ઈમરાન ખાનની પાર્ટી પીટીઆઈનું ચૂંટણી ચિહ્ન ક્રિકેટ બેટ રદ કરવામાં આવ્યું છે. ચૂંટણી પંચના નિર્ણય વિરુદ્ધ પાર્ટીએ ગુરુવારે પાકિસ્તાનની સુપ્રીમ કોર્ટમાં અરજી કરી છે. હાઈકોર્ટે ચૂંટણી પંચના આદેશને પુનઃસ્થાપિત કર્યો હતો, જેણે પક્ષની સંગઠનાત્મક ચૂંટણીઓને અમાન્ય જાહેર કરી હતી અને ચૂંટણી ચિન્હ ક્રિકેટ બેટને રદ કર્યો હતો