ધોલેરા SIR દ્વારા બનાવામાં આવી રહેલો રિવરફ્રન્ટ ખેતીની જમીન માટે નુકશાનકારક, ધોલેરાના RTI એક્ટિવિસ્ટે મુખ્યમંત્રીને પત્ર લખી રજૂઆત કરી
ભડીયાદ-ધોલેરા વચ્ચે વરસાદી પાણીના નિકાલની મુખ્ય જગ્યા આવેલી છે. ધોલેરા SIR (Dholera SIR) દ્વારા તેના પર જ આડો પાળો બનાવી રિવરફ્રન્ટ બનાવવાનો પ્લાન કરવામાં આવ્યો છે. જેના કારણે આગામી ચોમાસામાં ઉપરવાસના તમામ ગામોના વરસાદી પાણીનો નિકાલ સદંતર બંધ થશે.
કેન્દ્ર સરકાર દ્વારા ધોલેરા SIRને (Dholera SIR) સિંગાપુર જેવું સ્માર્ટ સીટી બનાવવાનો નિર્ણય લેવામાં આવ્યો છે. જે અમુક ગામોના ખેડૂતો માટે નુકસાનકારક સાબિત થઈ રહ્યો છે. ભડીયાદ-ધોલેરા વચ્ચે વરસાદી પાણીના નિકાલની મુખ્ય જગ્યા આવેલી છે. ધોલેરા SIR દ્વારા તેના પર જ આડો પાળો બનાવી રિવરફ્રન્ટ બનાવવાનો પ્લાન કરવામાં આવ્યો છે. જેના કારણે આગામી ચોમાસામાં ઉપરવાસના તમામ ગામોના વરસાદી પાણીનો નિકાલ સદંતર બંધ થશે અને પાણીનો નિકાલ ન થતા આ પાણી ખેતીની જમીનમાં ભરાઈ રહે તેમ છે.
આ કારણથી તમામ ગામોની મોટાભાગની ખેતીની જમીન પડતર રહેવાની શક્યતા છે. એક બાજુ સરકાર 2022માં ખેડૂતોની આવક બમણી કરવા માટે ઘણા પ્રયત્નો કરી રહી છે ત્યારે બીજી તરફ હાલ આ વિકાસના નામે ખેડૂતોને નુક્સાન થઈ રહ્યું છે, જે નુક્સાનકર્તા છે.
આ છે ખેડૂતોની સમસ્યાનો ઉકેલ
ઘણા ગામોના ખેડુતોને નુક્સાન જઈ રહ્યુ હોય ધોલેરાના આરટીઆઈ એક્ટીવીસ્ટ સહદેવસિંહ ચુડાસમાએ તંત્ર સમક્ષ રજુઆત કરી છે. તેમની રજુઆત છે કે, રિવરફ્રન્ટનું કામ તાત્કાલિક રદ કરવામાં આવે. આ માટે તેમણે વહીવટી તંત્ર અને ધોલેરા SIRને લેખિત રજૂઆત કરી છે. આગળ તેમણે કહ્યું કે, ખેડૂતોનાં હિતમાં ધંધુકા થી ભડીયાદ સુધી રોડની બંને બાજુની ગટરો પહોળી તથા ઊંડી કરી વચ્ચેના રસ્તા પર મોટા નાળા મુકવા તેમ જ ધોલેરા થી પસાર થતા એક્સપ્રેસ હાઈવે પર વરસાદી પાણીના નિકાલની જગ્યાએ બ્રિજ બનાવવા તેમજ અલીયાસર તળાવનાં ઓવરફ્લો પાણીના નિકાલ માટે પાળમાં પાઈપો નાખી ગટર માં જોડાણ આપવામાં આવે તો આ પ્રશ્નોનો કાયમી નિકાલ થાય એમ છે.
છેલ્લા ઘણા સમયથી રજુઆત છતા તંત્રના આંખ આડા કાન
આ બાબતે ગત વર્ષે પણ સ્થાનિક તંત્રને રજૂઆત કરવામાં આવી છે તેમછતાં અધિકારીઓની બેદરકારીથી ખેડૂતોને નુક્સાન ભોગવવાનો વારો આવ્યો છે. જેથી ચાલુ વર્ષે ચોમાસા પહેલા ઉનાળામાં જ ગટરો પહોળી કરવાનું તથા નાળા મુકવાનું કામ પૂર્ણ કરવામાં આવે એવી રજૂઆત સહદેવસિંહ ચુડાસમા દ્વારા વહીવટી તંત્રની સાથે સાથે મુખ્યમંત્રીને પણ લેખિત રજૂઆત કરવામાં આવી છે.
ઉનાળાની કાળઝાળ ગરમીમાં દરેક જગ્યાએ પાણીની તંગી વર્તાઈ રહી છે. ત્યારે ચોમાસાના પાણીનો યોગ્ય રીતે સંગ્રહ કરવામાં આવે તો દર વર્ષે ઉભી થતી પાણીની સમસ્યાનું નિરાકરણ પણ આવી શકે.
Latest News Updates
