ખાખી પર કલંક ! CID ક્રાઇમની ગાડીમાંથી કોન્સ્ટેબલ 17 પેટી દારૂ સાથે ઝડપાયો
રાત્રી પેટ્રોલિંગ દરમિયાન પાંથાવાડા પોલીસે અમદાવાદ CID ક્રાઇમની ગાડીમાંથી દારૂ ઝડપી પાડ્યો હતો. હાલ ડ્રાઇવર તરીકે ફરજ બજાવતા કોન્સ્ટેબલ વિષ્ણુ ચૌધરીની (Constable Vishnu Chaudhry) ધરપકડ કરીને બે દિવસના રિમાન્ડ મંજુર કર્યા છે.
Banaskantha : જો કોઇ ખાખીધારી પોલીસકર્મી (Police) દારૂની ખેપ મારતો ઝડપાય તો…! ચોક્કસ સવાલ સર્જાય. આવી જ એક સવાલો સર્જતી ઘટના બનાસકાંઠા જિલ્લામાંથી પ્રકાશમાં આવી છે . જ્યાં રાત્રી પેટ્રોલિંગ દરમિયાન પાંથાવાડા પોલીસે અમદાવાદ CID ક્રાઇમની ગાડીમાંથી દારૂ ઝડપી પાડ્યો છે. સાથે જ ડ્રાઇવર તરીકે ફરજ બજાવતા કોન્સ્ટેબલ વિષ્ણુ ચૌધરીની (Constable Vishnu Chaudhry) પણ ધરપકડ કરી છે. બાતમીના આધારે પાંથાવાડ નજીક પોલીસે વોચ ગોઠવી હતી.
પોલીસ તપાસમાં ખુલાસો થયો છે કે આરોપી વિષ્ણુ રાજસ્થાનથી (Rajasthan) દારૂનો જથ્થો લઇને આવ્યો હતો.ઉલ્લેખનીય છે કે CID ક્રાઇમના DYSP લાંબી રજા પર છે,જેનો લાભ ઉઠાવી ઇન્ચાર્જ DYSPની નજર ચૂકવીને કોન્સ્ટેબલ વિષ્ણુએ સરકારી વાહનનો દૂરપયોગ કર્યો.
મહત્વપૂર્ણ છે કે અગાઉ રાજકોટ પોલીસ (Rajkot Police)દારૂકાંડમાં બદનામ થઇ ચૂકી છે અને બુટલેગર સાથે રાજકોટ પોલીસની સાંઠગાંઠનો પર્દાફાશ થઇ ચૂક્યો છે, ત્યારે સત્તા અને હદ બહાર થયેલા ગુના મામલે પાંથાવાડ પોલીસ કેવી કાર્યવાહી કરે છે તે જોવું રહ્યું.
કોની રહેમરાહ હેઠળ વિષ્ણુ દારૂની હેરફેરનું જોખમ ઉઠાવ્યું ?
જોકે અહીં સૌથી મોટો સવાલ એ સર્જાય કે, કોન્સ્ટેબલ વિષ્ણુ પોલીસકર્મી છે કે પછી બુટલેગર..? કોન્સ્ટેબલ વિષ્ણુએ કોના ઇશારે દારૂની હેરફેર કરી..? રાજસ્થાનથી લવાયેલો દારૂ કોના ઉપયોગ માટે હતો..? શું રૂપિયા રળવા માટે વિષ્ણુએ કાયદો હાથમાં લીધો..? શું કોન્સ્ટેબલ વિષ્ણુની બુટલેગરો સાથે સંડોવણી છે..? શું દારૂકાંડમાં અન્ય અધિકારીઓની સંડોવણી તો નથી ને..? કોની રહેમરાહ હેઠળ વિષ્ણુ દારૂની હેરફેરનું જોખમ ઉઠાવ્યું..? શું દારૂકાંડની પોલીસ વિભાગ કરશે તપાસ..? શું ઝડપાયેલા પોલીસકર્મી વિરૂદ્ધ પોલીસ કરશે તપાસ..?
પોલીસની સરકારી ગાડી સાથે પકડાયેલ 2 આરોપી રિમાન્ડ પર
મળતી માહિતી મુજબ, ડ્રાઇવર તરીકે ફરજ બજાવતા કોન્સ્ટેબલ વિષ્ણુ ચૌધરી અને જયેશ ચૌધરીને ગઈકાલે રિમાન્ડ પર મોકલાયા હતા. આરોપીઓને કોર્ટમા રજૂ કરતા કોર્ટ બે દિવસના રિમાન્ડ મંજુર કર્યા છે.પકડાયેલ દારૂ, ગાડી અને આરોપીઓ મામલે હાલ પોલીસની ચુપકીદી જોવા મળી રહી છે.