Anand: બોરસદના દેદરડા ગામે શૌચાલયની જમીન પરથી માટી ખોદવાનું શરૂ કરાતાં સ્થાનિકોનો વિરોધ

આણંદ (Anand) ના બોરસદ (Borsad) તાલુકાના દેદરડા ગામે સ્થાનિકોએ માટી ખોદકામની કામગીરીનો વિરોધ નોંધાવ્યો છે. સ્થાનિકોનો આરોપ છે કે, શૌચાલય બનાવવા માટે ફાળવાયેલી જમીનમાંથી માટીનું ખોદકામ થઈ રહ્યું છે. એટલું જ નહીં આ ખોદકામથી આસપાસના ખેતરોને પણ નુકસાન થઈ શકે છે. સ્થાનિક લોકોએ આરોપ લગાવ્યો છે કે, જિલ્લા કલેક્ટરે યોગ્ય તપાસ વગર જ ખોદકામને મંજૂરી આપી દીધી છે. ખોદકામ તાત્કાલિક બંધ કરાવવામાં આવે તેવી સ્થાનિક લોકોએ માગણી કરી છે. સાથે જ જો કામગીરી બંધ નહીં થાય તો ઉગ્ર આંદોલનની ચીમકી પણ ઉચ્ચારી છે.

આણંદ જિલ્લાના દેદરડા ગામમાં ગોચર પાસે આવેલી જમીનની શોચાલય માટે ફાણવણી કરવામાં આવેલી છે. આ જગ્યા પર શૌચાલયનું બાંધકામ તો શરૂ થયું નથી પણ આ ફાળવણી કરેલી જમીનમાંથી માટીનું ખોદકામ થઇ રહ્યું છે. ડેડિકેટેડ ફ્રેઈટ કોરિડોર કોર્પોરેશન ઓફ ઈન્ડિયા લિ. કંપની દ્વારા રેલવે લાઈન માટે માટી જરૂરી હોવાથી તેના માટે આ ખોદકામ કરવામાં આવ્યું હોવાનું જાણવા મળ્યું છે. મહત્ત્વની વાત છે તે શૌચાલય માટે નીમ કરેલી જમીનમાંથી માટી ખોદકામ માટે આણંદ જિલ્લા કલેક્ટર દ્વારા જ પરવાનગી આપવામાં આવી છે. બોરસદ મામલતદાર દ્વારા જિલ્લા કલેકટરને અભિપ્રાય આપવામાં આવ્યો હતો. જિલ્લા કલેકટર દ્વારા યોગ્ય તપાસ કર્યા વિના જ માટી ખોદકામની મંજૂરી આપી દેવામાં આવી હોવાનો આક્ષેપ કરાયો છે. આ સાથે તાત્કાલિક આ માટીના ખોદકામને બંધ કરી દેવામાં આવે તેવી માગણી કરી છે.