Ahmedabad: વધતી મોંઘવારી વચ્ચે અમદાવાદીઓના માથે વધુ એક બોજો, પાણીના કનેક્શનના ચાર્જીસમાં વધારો કરાયો
અત્યાર સુધી અમદાવાદમાં (Ahmedabad) અલગ અલગ ઝોનમાં કાર્પેટ એરિયા મુજબ તેમજ ઘર મુજબ પાણીનો ચાર્જ વસુલવામાં આવતો હતો. જેમાં નવા પશ્ચિમ ઝોનમાં (West zone )યુનિટ અને કાર્પેટ એરિયા મુજબ ચાર્જ વસુલવામાં આવતો હતો.
એક તરફ મોંઘવારી (Inflation) દિવસે દિવસે વધી રહી છે. સામાન્ય વર્ગ માંડ પોતાનું ઘર ચલાવી રહ્યા છે. ત્યારે અમદાવાદવાસીઓ (Ahmedabad) પર વધુ એક કર બોજ નાખવામાં આવ્યો છે. અમદાવાદ મ્યુનિસિપલ કોર્પોરેશન (AMC) દ્વારા પાણીના કનેક્શનના (Water connection) ચાર્જીસમાં પણ નોંધપાત્ર વધારો કરવામાં આવ્યો છે. જેના કારણે અમદાવાદની પ્રજાને પાણી કનેક્શન મેળવવું હવે મોંઘુ પડશે. કોર્પોરેશનની વોટર કમિટીમાં પાણી પર વસુલવામાં આવતા ચાર્જ બાબતે આ મહત્વનો નિર્ણય લેવામાં આવ્યો છે.
હવેથી દરેક ઝોનમાં એકસરખો ચાર્જ વસુલાશે
અત્યાર સુધી પાણી વિતરણમાં શહેરના અલગ-અલગ ઝોનમાં અલગ-અલગ દરથી ચાર્જ વસુલવામાં આવતો હતો. જે બાબતે શહેરમાં હવે એક જ ચાર્જ વસૂલવાનો નિર્ણય વોટર કમિટી દ્વારા લેવામાં આવ્યો છે. આ નવી નીતિથી 7 ઝોનમાં હવે પાણીના નવા કનેક્શન બાબતે દરેક ઝોનમાં એક સરખો ચાર્જ ભરવાનો રહેશે.
અત્યાર સુધી પશ્ચિમ ઝોનમાં વસુલાતો હતો સૌથી વધુ ચાર્જ
અત્યાર સુધી અલગ અલગ ઝોનમાં કાર્પેટ એરિયા મુજબ તેમજ ઘર મુજબ પાણીનો ચાર્જ વસુલવામાં આવતો હતો. જેમાં નવા પશ્ચિમ ઝોનમાં યુનિટ અને કાર્પેટ એરિયા મુજબ ચાર્જ વસુલવામાં આવતો હતો. જેના કારણે શહેરમાં સૌથી વધુ ચાર્જ આ વિસ્તારના રહીશોએ ચૂકવવો પડતો હતો. હવે આ વિસ્તારના લોકોને કનેક્શન માટેના ચાર્જ માટે ઓછી રકમ ભરવી પડશે. તો શહેરના અન્ય પાંચ ઝોનમાં કનેક્શન માટે વધુ રૂપિયા ભરવા પડશે
પાણી કનેક્શનના ચાર્જમાં વધારો
રહેણાંક માટે પાણી કનેક્શનનો ચાર્જ 3 રૂપિયાથી વધારીને 10 રૂપિયા કરાયો છે. જ્યારે પાણીના કોમર્શિયલ કનેક્શનો ચાર્જ 20 રૂપિયાથી વધારીને 40 રૂપિયા કરવામાં આવ્યો છે. તેમજ રહેણાંક વિસ્તારમાં ગેરકાયદે પાણી કનેક્શન માટે 5 હજાર અને કમર્શિયલમાં ગેરકાયદે કનેક્શન માટે 10 હજારના દંડની જોગવાઈ કરી છે.
આ ઉપરાંત વોટર કમિટીમાં ગેરકાયદેસર લેવામાં આવેલા પાણીના કનેક્શન બાબતે પણ દંડની જોગવાઈ કરવાનો નિર્ણય લેવાયો છે રહેણાંક વિસ્તારમાં ગેરકાયદેસર પાણીનું કનેક્શન લેવાયું હશે તો પ્રથમ વખત 5000 અને જો કમર્શિયલમાં ગેરકાયદેસર પાણીનું કનેક્શન લેવાયું હશે તો 10000 રૂપિયા દંડ ભરવા માટે તૈયાર રહેવું પડશે. બીજી વખત જો ગેરકાયદેસર કનેક્શન લેતા આવા એકમો પકડાય તો દંડની રકમમાં વધારો કરાશે.