Ahmedabad : 26 જાન્યુઆરીએ બોમ્બ બ્લાસ્ટની ધમકીનો પત્ર લખનારની ધરપકડ, પુછપરછમાં થયો ચોંકાવનારો ખુલાસો
અમદાવાદ (Ahmedabad) ક્રાઇમ બ્રાન્ચે આશિષ નામના આરોપીની અમદાવાદમાં બોમ્બ બ્સાસ્ટ થવાની ધમકી આપતા પત્ર મામલે ધરપકડ કરી છે. આશિષ મૂળ UPના બલિયા જિલ્લાનો રહેવાસી છે અને અમદાવાદમાં નોકરી કરે છે.
અમદાવાદમાં 26 જાન્યુઆરીના રોજ બોમ્બ બ્લાસ્ટ ની ધમકી ભર્યો પત્ર લખનાર આરોપીની ધરપકડ કરી લેવામાં આવી છે. આ પત્રમાં ગીતા મંદિર બસ સ્ટેશન અને કાલુપુર રેલવે સ્ટેશન પર બ્લાસ્ટ કરવાની ધમકી આપવામાં આવી હતી. પ્રાથમિક તપાસમાં સામે આવ્યુ છે કે આરોપી એક પરણિત મહિલાના એક તરફી પ્રેમમાં પાગલ હતો. તેણે આ પરણિત મહિલાના દિયરને ફસાવવા માટે બોમ્બ બ્લાસ્ટની ધમકી આપતો પત્ર લખ્યો હોવાનુ સામે આવ્યું છે. ત્યારે પોલીસે આરોપીની ધરપકડ કરી ને આગળ ની કાર્યવાહી શરૂ કરી છે.
પ્રેમિકાના દિયરને ફસાવવા રચ્યુ કાવતરુ
અમદાવાદ ક્રાઇમ બ્રાન્ચે આશિષ નામના આરોપીની અમદાવાદમાં બોમ્બ બ્સાસ્ટ થવાની ધમકી આપતા પત્ર મામલે ધરપકડ કરી છે. આશિષ મૂળ UPના બલિયા જિલ્લાનો રહેવાસી છે અને અમદાવાદમાં નોકરી કરે છે. આરોપીએ પોતાની પ્રેમિકાના દિયરને ફસાવવા માટે એક પત્ર લખ્યો હતો, પરંતુ તેનું આ ષડયંત્ર સફળ ન થયુ અને તે પોલીસ ગિરફ્તમાં આવી ગયો છે. આરોપીની તપાસમાં સામે આવ્યું છે કે તે એક પરણિત મહિલાના એક તરફી પ્રેમમાં હતો અને જેની જાણ મહિલાના દિયર ઓમપ્રકાશને થઈ હતી. જેથી ઓમપ્રકાશ દ્વારા આરોપી આશિષને ધમકી આપવામાં આવી હતી કે તે તેની ભાભીને હેરાન કરવાનું બંધ કરી દે. જેથી બદલો લેવા માટે આરોપીએ આ પત્ર લખ્યો હતો.
મૂળ આરોપી સુધી પહોંચ્યુ ક્રાઇમ બ્રાન્ચ
ઘટનાની વિગત વાર વાત કરીએ તો અમદાવાદ પોલીસ કમિશનરને એક પત્ર મળ્યો હતો. જેમાં 26 જાન્યુઆરીના રોજ અમદાવાદમાં અલગ અલગ જગ્યાએ બોમ્બ બ્લાસ્ટની ધમકી આપવામાં આવી હતી. પત્રમાં ઓમપ્રકાશના નામ સાથે એક મોબાઇલ નંબર આપીને લખવામાં આવ્યો હતો. ક્રાઈમ બ્રાન્ચ તપાસ કરવા માટે ઇસનપુર ઓમપ્રકાશના ઘરે પહોંચી હતી. જ્યાં તેમને ખ્યાલ આવ્યો કે ઓમપ્રકાશ 22 જાન્યુઆરીથી 10 દિવસ માટે વતન ગયો છે. જે પછી પોલીસે તપાસ કરતા કરતા મૂળ આરોપી આશિષ પકડાયો હતો.
તપાસ કરતા જાણવા મળ્યું કે આરોપી ઓમપ્રકાશની ભાભીને છેલ્લા 1 વર્ષ થી એક તરફી પ્રેમ કરતો હતો અને જેને લઇ ઓમપ્રકાશ સાથે તેનો ઝગડો થયો હતો. 20 જાન્યુઆરીના રોજ બલિયાથી અમદાવાદ આવીને રેલવે સ્ટેશન ઉપર પત્ર લખી ઓમપ્રકાશને ફસાવવા માટે મોકલી આપ્યો હતો.
નોંધનીય છે કે આરોપી આશિષ ઉત્તર પ્રદેશ, હરિયાણા સહિત ગુજરાતમાં અલગ અલગ જગ્યાએ નોકરી કરી ચૂક્યો છે અને જ્યારે તે બલિયામાં એક પેથોલોજીમાં કામ કરતો હતો. ત્યારે ઓમપ્રકાશ પોતાની પથરીની સારવાર માટે પોતાની ભાભીને લઈને ગયો હતો. ત્યાં આરોપી સાથે મુલાકાત થઈ હતી અને નંબરની આપ લે થઈ હતી. હાલ આરોપીની વધુ તપાસ શરૂ કરવામાં આવી છે.
Latest News Updates
