Ahmedabad: સોશિયલ મીડીયાના માધ્યમથી કૌટુંબિક મામા અને સગીરા વચ્ચે પ્રેમ થયો, માતાએ જ કલંકિત સબંધને ઉજાગર કર્યો
સબંધોને શર્મસાર કરે તેવો વધુ એક કિસ્સો શહેરમાંથી સમે આવ્યો છે. પહેલા સગીરા ઇન્સ્ટાગ્રામ મારફતે તેની માતાના ફોનથી મામા સાથે વાત કરતી હતી જે બાદ મામાએ સગીરાને ફોન પણ આપ્યો હતો.
Ahmedabad: સબંધોને શર્મસાર કરે તેવો વધુ એક કિસ્સો શહેરમાંથી સમે આવ્યો છે. ફોટામાં દેખાતો આ છે કલંકિત મામા. જેની સામે તેની જ બહેને પોલીસ ફરિયાદ નોંધાવી છે. ઠક્કર નગરમાં રહેતી 38 વર્ષીય મહિલા ભાડાના મકાનમાં 14 વર્ષથી તેના બાળકો સાથે રહે છે. તેના પતિનું પાંચ વર્ષ પહેલાં અવસાન થયું હતું. આ મહિલાને સંતાનમાં બે દીકરા અને બે દીકરીઓ છે. છેલ્લા છ મહિનાથી આ મહિલા ઠક્કર નગર ચાર રસ્તા ખાતે આવેલી એક દુકાનમાં નોકરી કરવા જાય છે. છ મહિના પહેલા આ મહિલાના ફોનમાં તેની 17 વર્ષની દીકરીએ ઇન્સ્ટાગ્રામ એપ્લિકેશન ડાઉનલોડ કરી હતી અને તેનો ઉપયોગ કરતી હતી.
જ્યારે મહિલા પાસે ફોન હોય ત્યારે ફોનમાં મેસેજ આવતા હતા. જેથી મહિલાએ તેના દીકરાને આ મેસેજ બતાવતા તેને જણાવ્યું કે, તેની બહેન ઇન્સ્ટાગ્રામમાં એક યુવક સાથે વાત કરે છે અને આ યુવક અન્ય કોઈ નહીં પરંતુ આ સગીરાના પિતાની ફોઈના દીકરાનો દીકરો હતો એટલે કે સગીરાનો કુટુંબી મામા થાય છે.
આ કૌટુંબિક મામા એવો આરોપી લેગીન્સ બનાવવાનું કામ કરે છે અને છ મહિના પહેલાં તે ઇલાસ્ટિકનું કામ કરાવવા માટે આ મહિલાના ઘરે આવતો જતો હતો. આ સબંધ બાબતે મહિલાએ આ યુવકના પિતાને જાણ કરતાં સમાજના બે માણસો સાથે ઘરે આવ્યા હતા અને મહિલાની સગીર વયની દીકરીના લગ્ન કરાવી દો તેમ સમજાવવા મોકલ્યા હતા. ત્યારે આ મહિલાએ કહ્યું હતું કે, આરોપી યુવક તેનો ભાઈ થાય છે અને દીકરીનો મામા થાય છે જેથી આ લગ્ન શક્ય નથી અને તેની સાથે કોઈ સંબંધ રાખવો નથી અને હવે ઘરે આવવો ન જોઈએ.
થોડા દિવસ પહેલા આ મહિલા નોકરી પરથી ઘરે આવી હતી ત્યારે સાંજે મહિલાનો દીકરો અને દીકરી સાથે રમતા હતા. આ દરમિયાન સગીરા પાસેથી એક ફોન મળી આવ્યો હતો. જે આ મહિલા જોઈ જતા આ ફોન કોણે આપ્યો છે તેવી પૂછપરછ કરતા સગીરાએ જણાવ્યું કે, તેને તેના કૌટુંબિક મામાએ 4 મહિના પહેલા ફોન આપ્યો હતો અને તેની સાથે પ્રેમ સંબંધ છે અને તે ફોનમાં તેની સાથે વાતચીત કરવાની સાથે બહાર ફરવા પણ ગઈ હતી. આટલું જ નહીં છ મહિના પહેલા આ સગીરા ઘરે હતી ત્યારે તેના કૌટુંબિક મામા ઘરે આવ્યા હતા અને તેની સાથે શારીરિક સંબંધ પણ બાંધ્યા હતા તેવો ખુલાસો થયો હતો. આમ એક વાર નહીં પરંતુ ચાર વખત આરોપી સગીરાને લઈ ગયો હતો અને શારીરિક સંબંધ બાંધ્યો હતો. તેથી સમગ્ર બાબતને લઈને સગીરાની માતાએ ફરિયાદ નોંધાવતા પોલીસે ગુનો નોંધી તપાસ શરૂ કરી છે.