ધર્મેન્દ્રની સ્થિતિ અત્યંત નાજુક, ICU માં વેન્ટીલેટર સપોર્ટ પર રખાયા, અમેરિકાથી દીકરીઓને પણ બોલાવી લેવાઈ

બોલીવુડ અભિનેતા ધર્મેન્દ્રની તબિયત ફરી એકવાર ખરાબ થઈ ગઈ છે. આ વખતે તેમની તબિયત ગંભીર હોવાનું કહેવાય છે. અભિનેતાને તાજેતરમાં મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા હતા. અહેવાલો અનુસાર, શરૂઆતમાં શ્વાસ લેવામાં તકલીફ થતાં તેમને હોસ્પિટલમાં દાખલ કરવામાં આવ્યા હતા, પરંતુ તેમની સ્થિતિને કારણે હવે તેમને વેન્ટિલેટર સપોર્ટ પર રાખવામાં આવ્યા છે.

મીડિયા રિપોર્ટ્સ અનુસાર, ડૉક્ટરોની એક ટીમ સતત અભિનેતાનું નિરીક્ષણ કરી રહી છે. જોકે, તેમની સ્થિતિ અંગે કોઈ સત્તાવાર નિવેદન જારી કરવામાં આવ્યું નથી.

દીકરીઓને પણ અમેરિકાથી બોલાવી લેવાઈ

રિપોર્ટ્સ અનુસાર, ધર્મેન્દ્રના પરિવારના તમામ સભ્યો હાલમાં હોસ્પિટલમાં છે. એવું પણ જાણવા મળ્યું છે કે તેમની દીકરીઓને અમેરિકાથી બોલાવવામાં આવી છે. ધર્મેન્દ્ર છેલ્લા કેટલાક દિવસોથી અનેક સ્વાસ્થ્ય સમસ્યાઓનો સામનો કરી રહ્યા છે.

31 ઓક્ટોબરે હોસ્પિટલમાં કરાયા દાખલ

બોલીવુડ અભિનેતા ધર્મેન્દ્રને 31 ઓક્ટોબરે હોસ્પિટલમાં દાખલ કરવામાં આવ્યા હતા. હોસ્પિટલમાં દાખલ થયા બાદ, એવા અહેવાલો બહાર આવ્યા કે તેમને શ્વાસ લેવામાં તકલીફ પડી રહી હતી, જેના કારણે તેમને મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા હતા. 89 વર્ષીય અભિનેતા છેલ્લા કેટલાક દિવસોથી તબીબી દેખરેખ હેઠળ હતા અને તેમને ICUમાં રાખવામાં આવ્યા હતા. જોકે, હોસ્પિટલમાં દાખલ થયાના થોડા સમય પછી, હોસ્પિટલના સ્ટાફે તેમની સ્થિતિની જાણ કરતા કહ્યું, “હમણાં ચિંતા કરવાની કોઈ વાત નથી. તેઓ સ્થિર છે. તેમના પેરામીટર બરાબર છે. તેમના હૃદયના ધબકારા 70 છે, તેમનું બ્લડ પ્રેશર 140/80 છે, અને તેમના યુરીન સેમ્પલ પણ નોર્મલ છે.”

આગામી ફિલ્મ ‘ઈક્કીસ’ નું ટ્રેલર તાજેતરમાં થયુ રિલીઝ

આ અભિનેતા ડિસેમ્બરમાં પોતાનો 90મો જન્મદિવસ ઉજવશે. તેઓ છેલ્લા કેટલાક વર્ષોથી સ્વાસ્થ્ય સમસ્યાઓ સામે ઝઝૂમી રહ્યા છે. એપ્રિલ 2025 માં, તેમણે મોતિયાની સર્જરી કરાવી અને સ્વસ્થ થયા. તેમની ઉંમર હોવા છતાં, તેઓ તેમના અંગત અને વ્યાવસાયિક જીવનમાં સક્રિય રહે છે. તેઓ છેલ્લે 2024 માં આવેલી ફિલ્મ “તેરી બાતેં મેં ઐસા ઉલઝા જિયા” માં જોવા મળ્યા હતા. ધર્મેન્દ્રની ફિલ્મ કારકિર્દી 1960 માં શરૂ થઈ હતી. તેઓ સેંકડો ફિલ્મોમાં દેખાયા છે અને આજે પણ ઈન્ડસ્ટ્રી સક્રિય છે. તાજેતરમાં, તેમની આગામી ફિલ્મ “ઈક્કીસ” નું ટ્રેલર રિલીઝ થયું હતું, અને તેમના અભિનયની પ્રશંસા કરવામાં આવી હતી.

ગુજરાતના સૌથી અમીર એવા વડોદરા સ્ટેટના મહારાજા પર ભારત સરકારે કેમ લગામ લગાવવાની ફરજ પડી હતી- વાંચો