સાવધાન ! રેગિંગથી બચવા માટે યુનિવર્સિટીઓ અપનાવી રહી છે નવા-નવા રસ્તા
આસામમાં રેગિંગના મામલાઓને જોતા હવે વહીવટીતંત્ર એલર્ટ મોડમાં આવી ગયું છે. રેગિંગને રોકવા માટે નવી પદ્ધતિઓ અપનાવવામાં આવી રહી છે.
ડિબ્રુગઢ યુનિવર્સિટી માં રેગિંગનો મામલો પ્રકાશમાં આવ્યા બાદ આસામની ઉચ્ચ શિક્ષણ સંસ્થાઓ એલર્ટ મોડ પર આવી ગઈ છે. આસામની વિવિધ ઉચ્ચ શિક્ષણ સંસ્થાઓમાં ફ્રેશર્સની હેરાનગતિને રોકવા માટે કડક સાવચેતીના પગલાં લેવામાં આવ્યા છે. આમાં ફ્રેશર્સને અલગ હોસ્ટેલમાં રાખવાનો પણ સમાવેશ થાય છે. સિલચરમાં આસામ યુનિવર્સિટીના સત્તાવાળાઓએ વરિષ્ઠ વિદ્યાર્થીઓને રેગિંગમાં સામેલ ન થવા માટે બોન્ડ પોસ્ટ કરવા કહ્યું છે. વિદ્યાર્થીઓને કોઈપણ પ્રકારની રેગિંગ પ્રવૃતિમાં સામેલ ન થવા અંગે સ્પષ્ટતા આપતું ફોર્મ ઓનલાઈન ભરવા માટે નોટિસ આપવામાં આવી છે.
અલગ હોસ્ટેલની વ્યવસ્થા
યુનિવર્સિટીના દરેક વિદ્યાર્થીએ ફોર્મ ભરીને રેગિંગ સામે બોન્ડ આપવાનું રહેશે. યુનિવર્સિટીના એક અધિકારીએ કહ્યું કે જો કોઈ રેગિંગ કેસમાં સંડોવણીના પુરાવા મળશે તો આવું કરનારા વિદ્યાર્થી સામે કડક કાર્યવાહી કરવામાં આવશે. સિલચર મેડિકલ કોલેજ અને NIT સિલચરના સત્તાવાળાઓએ નવા પ્રવેશ મેળવનારા વિદ્યાર્થીઓ માટે અલગ હોસ્ટેલની વ્યવસ્થા કરી છે.
વિદ્યાર્થીઓને બીજા વર્ષમાં ટ્રાન્સફર કરવામાં આવશે
સિલચર મેડિકલ કોલેજના પ્રિન્સિપાલ ડો. બાબુલ કુમાર બેઝબરુઆએ જણાવ્યું કે સાવચેતીના ભાગરૂપે MBBS કોર્સના નવા વિદ્યાર્થીઓને કોલેજમાં અલગ હોસ્ટેલમાં રાખવાની વ્યવસ્થા કરવામાં આવી છે. તેમણે કહ્યું, “એમબીબીએસ ફ્રેશર્સને પણ પીજી કક્ષાના પ્રથમ વર્ષના વિદ્યાર્થીઓની સાથે નવી બનેલી પીજી હોસ્ટેલમાં રહેવાની વ્યવસ્થા કરવામાં આવી રહી છે. આખું વર્ષ આ હોસ્ટેલમાં રહ્યા બાદ આવતા વર્ષે તેઓને બીજી હોસ્ટેલમાં ટ્રાન્સફર કરવામાં આવશે, જ્યાં MBBS કોર્સના સિનિયર વિદ્યાર્થીઓ રહે છે.
સુરક્ષા વ્યવસ્થા રહેશે ચુસ્ત
ગયા વર્ષે, બોયઝ હોસ્ટેલમાં રેગિંગને કારણે સિલચર મેડિકલ કોલેજના આઠ વરિષ્ઠ વિદ્યાર્થીઓને ચોક્કસ સમયગાળા માટે સંસ્થામાંથી હાંકી કાઢવામાં આવ્યા હતા. મેડિકલ કોલેજના એક અધિકારીએ જણાવ્યું હતું કે ભૂતકાળના અનુભવ દર્શાવે છે કે જ્યારે ફ્રેશર વિદ્યાર્થીઓને સિનિયર્સ સાથે એક જ હોસ્ટેલમાં રાખવામાં આવે છે, ત્યારે સમસ્યા થાય છે.
નવા વિદ્યાર્થીઓ વારંવાર સિનિયર્સ દ્વારા રેગિંગનો શિકાર બને છે. એટલા માટે આ વખતે તેમને એક વર્ષ માટે અલગ-અલગ હોસ્ટેલમાં રાખવામાં આવશે. હોસ્ટેલની આસપાસ ચુસ્ત બંદોબસ્ત ગોઠવી દેવામાં આવ્યો છે. એન્ટિ-રેગિંગ સ્ક્વોડના સભ્યો સમગ્ર સંસ્થામાં તકેદારી રાખી રહ્યા છે.