ભારતીય ગુજરાતીઓએ લોસ એન્જલિસની સેરીટોસ કોલેજના લાભાર્થે 42 લાખ ડૉલરનું કર્યું દાન
લોસ એન્જલિસ (Los Angeles)ની સેરિટોસ કોલેજ (Cerritos College)માં મોટી સંખ્યામાં ભારતીય અને ગુજરાતી વિદ્યાર્થીઓ અભ્યાસ કરે છે.
લોસ એન્જલિસ (Los Angeles)ની સેરિટોસ કોલેજ (Cerritos College)માં મોટી સંખ્યામાં ભારતીય અને ગુજરાતી વિદ્યાર્થીઓ અભ્યાસ કરે છે. વિદ્યાર્થીઓની અભ્યાસ અને કૌશલ્ય વૃધ્ધિ માટે 17 નવા વિભાગો શરૂ થવાના છે અને તે માટે નવું સંકુલ પણ આકાર લઈ રહ્યું છે. આ માટે અહીં વસતા ગુજરાતીઓએ દાનની સરવાણી વહાવી છે.
સેરીટોસ કોલેજ માટે કુલ 42 લાખ ડોલરનું ભંડોળ ગુજરાતીઓ દ્વારા એકત્ર થયું
ગુજરાતીઓએ સ્થાપેલા સેરીટોસ કોલેજ ફાઉન્ડેશન દ્વારા કોલેજના શૈક્ષણિક કાર્યક્રમો માટે 32 લાખ ડોલરનું દાન એકત્ર કરવામાં આવ્યું છે. જ્યારે એક ગુજરાતી ડોક્ટર દંપતીઓ દ્વારા 10 લાખ ડોલરની માતબર રકમનું દાન કરાયું છે. સેરીટોસ કોલેજ માટે કુલ 42 લાખ ડોલરનું ભંડોળ ગુજરાતીઓ દ્વારા એકત્ર થયું છે. સેરિટોસ કોલેજ અમેરિકાની પ્રસિદ્ધ કોલેજો પૈકીમાં એક છે.
અમેરિકાના લોસ એન્જલિસથી વીસ માઈલ દૂર આવેલા સેરિટોસ સિટીમાં આવેલી સેરિટોસ કોલેજ, અમેરિકન વિદ્યાર્થીઓના પ્રવેશ મેળવવાની બાબતમાં 8મી રેન્ક ધરાવે છે. સાથે અમેરિકાની 25 કોમ્યુનિટી કોલેજોમાં 9મું સ્થાન ધરાવે છે. કોલેજમાં મોટી સંખ્યામાં ભારતીય વિદ્યાર્થીઓ પણ અભ્યાસ કરી રહ્યા છે.
ઋણ સ્વીકાર માટે તાજેતરમાં ઝૂમ એપ પર બેઠક યોજાઈ
ભારતીય ગુજરાતીઓ દ્વારા કોલેજને મળેલા ભંડોળના ઋણ સ્વીકાર માટે તાજેતરમાં ઝૂમ એપ પર બેઠક યોજાઈ હતી. આ બેઠકમાં કોલેજના પ્રેસિડન્ટ ડૉ. જાસ ફિરો, સિટી ઓફ સેરિટોસના મેયર નરેશ સોલંકી, કોલેજ ફાઉન્ડેશનના પ્રેસિડન્ટ પરિમલ શાહ, ફાઉન્ડેશન કમિટીના ડાયરેક્ટર તથા લેબોન હોસ્પિટાલિટી ગ્રુપના યોગી પટેલ, જૈન સોશિયલ ગૃપના પ્રેસિડેન્ટ રાજેન્દ્ર વોરા તથા ડૉ. જસવંત મોદીએ ભાગ લીધો હતો. સેરિટોસ સિટીના મેયર નરેશ સોલંકીએ સ્થાનિક સમાજના ઉત્કર્ષ માટે ઉદારતા દર્શાવવા બદલ તબીબ દંપતી ડો. જસવંત મોદી તથા ડો. મીરા મોદી, ડો. હર્ષદ શાહ તથા ડો. રક્ષા શાહને અભિનંદન આપ્યા હતા.
સેરીટોસ કોલેજ ફાઉન્ડેશન પ્રેસિડન્ટ પરિમલ શાહ અને કમિટી ડાયરેક્ટર યોગી પટેલે ફાઉન્ડેશનની પ્રવૃતિનો ચિતાર રજૂ કર્યો હતો. આ તબક્કે ફાઉન્ડેશન પ્રમુખ પરિમલ શાહે દાતા તબીબ દંપતીઓ અને ફાઉન્ડેશનના સદકાર્યથી માત્ર ભારતીય અમેરિકનો જ નહીં, સ્થાનિક લોકો અને કોલેજો તથા શૈક્ષણિક કાર્યક્રમોને લાભ થશે.
ફાઉન્ડેશનના ડાયરેક્ટર લેબોન હોસ્પિટાલિટી ગ્રુપના યોગી પટેલે જણાવ્યું હતું કે કોલેજના શૈક્ષણિક કાર્યક્રમો માટે 32 લાખ ડોલરથી વધુનું ભંડોળ એકત્ર થયું છે. જેનાથી હાલ અભ્યાસ કરતા અને નવા પ્રવેશનાર વિદ્યાર્થીઓને એમની કારકિર્દી અને ભવિષ્યના ઘડતરમાં ઉપકારક રહેશે.
આ પણ વાંચો: દિલ્હી હાઈકોર્ટે ‘હાથી મેરે સાથી’ના રિલીઝ પર રોક લગાવનો કર્યો ઈનકાર