Rajkot: ઘોર કળિયુગ, બે દિવસ પહેલા પડધરીમાં તરછોડાયેલા બાળકની માતા “કુંવારી” નીકળી
શનિવારે વહેલી સવારે રાજકોટ જિલ્લાના પડધરીના નાની ખીજળિયા ગામમાં એક નવજાત બાળકી મળી આવી હતી. ત્યારબાદ પોલીસે તપાસ હાથ ધરી હતી.
Rajkot: બે દિવસ પહેલા રાજકોટના (Rajkot) પડધરી તાલુકાના નાના ખીજડીયા ગામે તરછોડાયેલી હાલતમાં મળેલા નવજાત બાળકી (New Born Baby) મામલે ચોંકાવનારો ખુલાસો થયો છે. આ બાળકને જન્મ આપનાર કુંવારી માતા હોવાનું સામે આવ્યું છે.
રાજકોટ જિલ્લા પોલીસ વડા બલરામ મીણાએ મિડીયા સાથેની વાતચીતમાં કહ્યું હતુ કે, નાના ખીજડીયા ગામમાંથી મળેલા બાળકની તપાસ કરતા આ બાળકની માતા કુંવારી હોવાનું સામે આવ્યું છે.
બાળકીને જન્મ આપનાર કુંવારી માતાના, માતા-પિતા આ જ ગામમાં ખેત મજૂરી કરતા હોવાનું સામે આવ્યું છે. પોતાની દિકરીનું પાપ છુપાવવા માટે નિષ્ઠુર માતા પિતાએ અવાવરૂ સ્થળે બાળકને જન્મ આપીને ત્યાં જ તરછોડીને ફરાર થઇ ગયા હતા.
આ રીતે પકડાઇ કુંવારી માતા
પોલીસે જ્યારે આ બાળક મળ્યું ત્યારબાદ આસપાસના ગામમાં સગર્ભા મહિલા અંગે તપાસ શરૂ કરી હતી,આંગણવાડી બહેનો અને સરકારી તેમજ ખાનગી હોસ્પિટલમાં કોઇ સગર્ભા મહિલાઓ છે કે કેમ તે અંગે પણ માહિતી એકત્ર કરી હતી જેના આધારે નાના ખીજડીયા ગામની જ એક વાડીમાં કામ કરતા પરપ્રાંતિય મજૂર દ્વારા આ કૃત્ય કરવામાં આવ્યું હોવાનું સામે આવ્યું.
ગર્ભ રાખનારની શોધ કરશે પોલીસ
જિલ્લા પોલીસ વડા બલરામ મીણાએ વધુમાં ઉમેર્યું હતુ કે, આ તપાસ આટલેથી પૂરી થતી નથી. સમગ્ર મામલે ગર્ભ રાખનાર વ્યક્તિ કોણ છે, આ સગીરા કોઇ ગુનાહિત કૃત્યનો ભોગ બની છે કે કેમ તે અંગે તપાસ કરાશે અને ગર્ભ રાખનાર કોણ છે તેની શોધખોળ કરીને કાયદેસરની કાર્યવાહી હાથ ધરાશે.