બનાસકાંઠા : ગાંજાની હેરાફેરીનો પર્દાફાશ, ડીસા પોલીસે એક આરોપીને ઝડપી લીધો
આરોપી મહાદેવ મેઘવાળ 5 કિલો 766 ગ્રામ ગાંજો લઈ ડીસાના ફીરોજ સિપાઈને આપવા આવી રહ્યો હતો. જેથી પોલીસે ફિરોજ સિપાઈ નામના ઈસમ સામે પણ એનડીપીએસ એક્ટ મુજબ ગુનો નોંધી તેને પકડવા માટેના ચક્રો ગતિમાન કર્યા છે.
રાજસ્થાન સરહદથી બનાસકાંઠા (Banaskantha)જિલ્લામાં મોટાપાયે નશીલા પદાર્થોની હેરફેર થાય છે. ડીસા (Deesa)ઉત્તર પોલીસે બાતમીના આધારે 5 કિલો 766 ગ્રામ જેટલો ગાંજાનો (Cannabis)જથ્થો ઝડપી આરોપી સામે એનડીપીએસ એક્ટ (NDPS Act) મુજબ કાર્યવાહી હાથ ધરી છે. પોલીસે એક આરોપીને ઝડપી પાડ્યો છે. જ્યારે બીજા આરોપીને પકડવાના ચક્રો ગતિમાન કર્યા છે. બનાસકાંઠા જિલ્લો રાજસ્થાન સરહદને અડીને આવેલો છે. જેથી જિલ્લામાં વિદેશી દારૂ સહિત નશીલા પદાર્થોની મોટા પ્રમાણમાં હેરફેર કરવામાં આવે છે. ગુજરાત રાજ્યમાં બનાસકાંઠા જિલ્લાથી જ મોટાપાયે વિદેશી દારુ તેમજ અફીણ અને ગાંજાની હેરફેર કરતા લોકો પોલીસના હાથે ઝડપાયો છે.
આ અંગે મદદનીશ પોલીસ અધિક્ષક પૂજા યાદવે જણાવ્યું હતું કે ડીસા ઉત્તર પોલીસને બાતમી મળી હતી કે સાંચોરથી ડીસા આવી રહેલી બસમાં મહાદેવ મેઘવાળ નામનો વ્યક્તિ ગાંજો લઈ તેના વેચાણ અર્થે ડીસા આવી રહ્યો છે. જે બાતમીના આધારે પોલીસે વોચ ગોઠવી આરોપી મહાદેવ મેઘવાળને 5 કિલો 766 ગ્રામ જેટલા ગાંજાના જથ્થા સાથે ઝડપી પાડયો છે. જેની પાસેથી ગાંજા સહિત કુલ 61060 રૂપિયાનો મુદ્દામાલ કબ્જે લઈ કાયદેસરની કાર્યવાહી હાથ ધરવામાં આવી છે.
આરોપી મહાદેવ મેઘવાળ 5 કિલો 766 ગ્રામ ગાંજો લઈ ડીસાના ફીરોજ સિપાઈને આપવા આવી રહ્યો હતો. જેથી પોલીસે ફિરોજ સિપાઈ નામના ઈસમ સામે પણ એનડીપીએસ એક્ટ મુજબ ગુનો નોંધી તેને પકડવા માટેના ચક્રો ગતિમાન કર્યા છે. મહાદેવ મેઘવાળ કેટલા સમયથી ગાંજાની હેરાફેરી કરતો હતો તેમજ અગાઉ કેટલા લોકો સાથે તેણે ગાંજાનો વેપાર કર્યો છે આ તમામ બાબતોને લઈ પોલીસે કોલ ડિટેલના આધારે અન્ય આરોપીઓ અને સમગ્ર નેટવર્કની તપાસ હાથધરી છે.
ગુજરાતમાં રાજસ્થાન થી મોટાપાયે નશીલા પદાર્થોની હેરફેર વધી છે. ત્યારે પાંચ કિલો ગાંજા સાથે પકડાયેલા આરોપી છેલ્લા કેટલાય સમયથી ગુજરાતમાં ગાંજો ઘુસાવતો તો હતો. તેમજ તેની સાથે કેટલા જોડાયેલા લોકો છે. તે બાબતે પોલીસ તપાસમાં વધુ તથ્યો બહાર આવશે.