Aravalli: નોકરીની લાલચ આપી પૈસા પડાવતી ઠગ ટોળકી પોલીસે ઝડપી, બોગસ નિમણૂંક ઓર્ડર પધરાવતા હતા
આરોપીઓએ 53 લોકોને આવી રીતે પોતાની જાળમાં ફસાવીને તેમની પાસેથી રુપિયા 59.80 લાખ પડાવી લીધા છે. આ ઠગ ટોળકીએ અરવલ્લી જીલ્લા ઉપરાંત સાબરકાંઠા, વડોદરા, દાહોદ, મહિસાગર અને ખેડા જિલ્લાના બેરોજગારોને નિશાન બનાવ્યા હતા.
સચિવાલયથી માંડીને પોલીસમાં નોકરી અપાવવાની લાલચ આપીને પૈસા ઠગી લેતી ટોળકી (Cheater Gang) અરવલ્લી પોલીસે ઝડપી છે. અરવલ્લી પોલીસે (Aravalli Police) એક પોલીસ ફરિયાદને આધારે તપાસ કરતા ઠગ ટોળકીના ચાર શખ્શોને ઝડપી પાડ્યા છે. તેઓ નોકરી અપાવવા બહાને પૈસા પડાવી લેતા અને બદલામાં નોકરીનો બોગસ ઓર્ડર પણ પકડાવી દેતા હતા.
શામળાજી (Shamlaji) પોલીસ મથકમાં એક ફરિયાદ નોંધાઈ હતી. જે મુજબ પાંચ લોકોને નોકરી આપવાના બહાને તેમની પાસેથી પૈસા પડાવ્યા હતા. તેમણે પોલીસ, ખાણખનીજ, રેવન્યુ, સચિવાલય અને હાઉસીંગ બોર્ડના બોગસ નિમણૂંક ઓર્ડર આપ્યા હતા. અરવલ્લી SOGએ તપાસ હાથ ધરી હતી. જે દરમ્યાન આ ચારેય શખ્શોને પોલીસે ઝડપી પાડ્યા હતા.
આરોપીઓએ 53 લોકોને આવી રીતે પોતાની જાળમાં ફસાવીને તેમની પાસેથી રુપિયા 59.80 લાખ પડાવી લીધા છે. આ ઠગ ટોળકીએ અરવલ્લી જીલ્લા ઉપરાંત સાબરકાંઠા, વડોદરા, દાહોદ, મહિસાગર અને ખેડા જિલ્લાના બેરોજગારોને નિશાન બનાવ્યા હતા. તેમને પોલીસ, સચિવાલય અને રેવન્યુ જેવા વિભાગોમાં નોકરીઓની લાલચ આપતા હતા.
SPએ કહ્યું ગેંગને ઝડપવા ટીમો રચી હતી
આ અંગેની ફરિયાદ શામળાજી પોલીસ મથકે નોંધાઈ હતી. અરવલ્લી SP સંજય ખરાતે કહ્યું હતુ, ભિલોડા તાલુકાના પાંચ લોકોને નોકરી અપાવવાને બહાને છેતરપિંડી આચરી હતી. જેની તપાસ કરતા ચારેય શખ્શોને ઝડપી લેવામાં આવ્યા છે. તેમને ઝડપી પાડવા SOGની આગેવાનીમાં જુદી જુદી ટીમો બનાવવામાં આવી હતી. ભૂગર્ભમાં ઉતરતા પહેલા જ એક સાગમટે ઝડપી લેવાયા.
અરવલ્લી પોલીસે તેમની ટોળકીમાં હજુ બીજા કેટલા લોકો અને એજન્ટો સામેલ હતા, તે દિશામાં તપાસ હાથ ધરી છે. અરવલ્લી પોલીસનું માનવુ છે કે હજુ પણ આ ઠગ ટોળકીએ બેરોજગાર યુવાનોને પોતાની જાળમાં ફસાવ્યા હોઈ શકે છે. પોલીસ તપાસ દરમ્યાન જોકે હજુ પણ આ ઠગ ટોળકીના રાઝ ખૂલવાની આશા છે.
ઝડપાયેલા આરોપી
1. સુરેશ રાયસીંગભાઈ ભુરીયા, રહે.પાટીયા, તા.ગરબડા જી. દાહોદ 2. અમિત સત્યેન્દ્રપ્રકાશ શર્મા, રહે. આજવા રોડ, વડોદરા 3. શૈલેષ બચુભાઈ ડામોર રહે, નાંદવા, તા.ગરબાડા, જી દાહોદ 4. લાલાભાઈ નાનજીભાઈ મેડા રહે. સાબરદાણ ફેકટરીના ગેટ પાસે, હિંમતનગર મૂળ રહે.નેલસૂર, તા.ગરબાડા, જી.દાહોદ,
આ પણ વાંચો: AHMEDABAD: મેડિકલેમની ઊંચી રકમ મેળવવા તૈયાર કરી ડમી ફાઈલ, હોસ્પિટલમાં ઈન્ક્વાયરી આવતા ફૂટ્યો ભાંડો
Latest News Updates
