નાકમાં લીંબુના રસના ટીપા નાખવાથી ખતમ થઇ જશે Corona Virus? જાણો આ દાવામાં સાચું કેટલું છે

સોશિયલ મીડિયા પર એક વીડિયો વાયરલ થયો છે જેમાં દાવો કરવામાં આવ્યો છે કે નાકમાં લીંબુનો રસ (LEMON DROPS) નાખવાથી કોરોના વાયરસનો ચેપ તરત જ સમાપ્ત થઈ જશે.

  • Tv9 webdesk42
  • Published On - 20:32 PM, 3 May 2021
નાકમાં લીંબુના રસના ટીપા નાખવાથી ખતમ થઇ જશે Corona Virus? જાણો આ દાવામાં સાચું કેટલું છે
FILE IMAGE

LEMON DROPS : આજકાલ એક વિડિઓ સોશિયલ મીડિયા પર ઝડપથી વાયરલ થઈ રહ્યો છે, જેમાં દાવો કરવામાં આવ્યો છે કે નાકમાં લીંબુના રસના ટીપા નાખવાથી કોરોના વાયરસનો ચેપ તરત જ સમાપ્ત થઈ જશે. આ વીડિયો એવા સમયે વાયરલ થઈ રહ્યો છે જ્યારે દેશમાં નવા કેસ અને મૃત્યુમાં રેકોર્ડ બ્રેક આંકડાઓ નોંધાઈ રહ્યા છે. નોંધપાત્ર વાત એ છે કે દેશના તમામ રાજ્યોમાં 18 વર્ષથી ઉપરના બધા લોકોને રસી આપવામાં આવી રહી છે. પરંતુ નાકમાં લીંબુના રસના ટીપા (LEMON DROPS ) નાખીને કોરોના વાયરસનો ચેપ મટાડી શકાય છે?

જાણો શું દાવો કરવામાં આવી રહ્યો છે
સોશિયલ મીડિયા પર શેર કરવામાં આવી રહેલા વીડિયોમાં દાવો કરવામાં આવ્યો છે કે નાકમાં લીંબુનો રસ (LEMON DROPS) નાખવાથી કોરોના વાયરસ તાત્કાલિક નાબૂદ થાય છે. સોશ્યલ મીડિયા પર વાયરલ થયેલા વીડિયોમાં એક તિલકધારી સાધુબાબા દાવો કરી રહ્યા છે કે “લીંબુ લો અને તેના રસના બે-ત્રણ ટીપા તમારા નાકમાં નાખો. તેને મૂક્યાના માત્ર 5 સેકંડ પછી, તમે જોશો કે તમારા નાક, કાન, ગળા અને હૃદયના બધા ભાગો શુદ્ધ થઈ જશે.”

વળી, વીડિયોમાં સાધુ એમ પણ જણાવી રહ્યાં છે કે જો તમને ચેપને લીધે ગળું, નાક જામ થવું, ગળામાં દુખાવો અથવા તાવ આવે તો આ નુસખો બધી સમસ્યાઓ સામે રાહત આપશે. તમારે તેનો ઉપયોગ કરવો જ જોઇએ, આજ સુધી મેં આ ઘરેલુ ઉપાયનો ઉપયોગ કરતા મરતા લોકો જોયા નથી. આ નુસખો નાક, કાન, ગળા અને હૃદયના ઉપચાર માટે છે. બાકી તમે જે કરવા માંગો છો તે કરો, પરંતુ તેને અજમાવી જુઓ.

જાણો આ દાવામાં સાચું કેટલું?
ફેક ન્યુઝને ઓળખવા માટે પ્રેસ ઇન્ફોર્મેશન બ્યુરો (પીઆઈબી) એ કેન્દ્ર સરકારના મંત્રાલયો, વિભાગો અને યોજનાઓ અંગેના સમાચારોની ચકાસણી કરવા માટે પીઆઈબી ફેક્ટ ચેક ટીમ તરીકે ઓળખાતું ‘ફેક્ટ ચેક યુનિટ’ બનાવ્યું છે. પીઆઈબી ફેક્ટ ચેક ટીમે તેના ટ્વિટર હેન્ડલ પર આખી તપાસ શેર કરી છે. પીઆઈબી ફેક્ટ ચેક ટીમે ટ્વિટ કરીને કહ્યું કે વીડિયોમાં કરવામાં આવેલા દાવા નકલી છે. એવા કોઈ વૈજ્ઞાનિક પુરાવા નથી કે નાકમાં લીંબુનો રસ (LEMON DROPS) ઉમેરીને કોવિડ -19 નાબૂદ કરી શકાય છે.

ડોક્ટરની સલાહ લો, જાતે ડોક્ટર ન બનો
કોરોના રોગચાળાની બીજી લહેરમાં વાયરસના ચેપને રોકવા માટે સોશિયલ મીડિયા પર વાયરલ થતા વિવિધ પ્રકારના નુસખાઓ લોકો ડોક્ટરની સલાહ લીધા વગર ઘરે અજમાવી રહ્યા છે. પરંતુ કોઈ પણ નુસખા અપનાવતા પહેલાં તેના વિશે યોગ્ય રીતે જાણવું તમારા સ્વાસ્થ્ય માટે વધુ સારું રહેશે. કારણ કે કેટલીક વસ્તુઓ વિશે જાણ્યા વગર તમારા સ્વાસ્થ્ય પર પણ જોખમી અસર કરી શકે છે. તેથી કોરોનાની સારવાર માટે કોઈપણ પ્રકારની વસ્તુનો ઉપયોગ કરતા પહેલા, તમારે ડોક્ટરની સલાહ લેવી જ જોઇએ.