હાઈવે પરથી હટાવવામાં આવશે ટોલ પ્લાઝા, કેમેરાથી થશે પેમેન્ટ, ટૂંક સમયમાં દેશભરમાં શરૂ થશે યોજના
નવી યોજના હેઠળ દેશના રાજમાર્ગો પરના તમામ ટોલ પ્લાઝાને હટાવીને તેમની જગ્યાએ ખાસ કેમેરા લગાવવામાં આવશે જે આપમેળે ટોલ વસૂલ કરશે.
આગામી સમયમાં દેશમાં કોઈ ટોલ પ્લાઝા (Toll Plaza) નહીં હોય. સરકાર કેમેરા દ્વારા ઓટોમેટિક ટોલ પેમેન્ટ (Toll payment)ની યોજના પર આગળ વધી રહી છે. કેન્દ્રીય પ્રધાન નીતિન ગડકરીના જણાવ્યા અનુસાર, તે પ્રાયોગિક ધોરણે શરૂ થઈ ગયું છે અને તેનાથી સંબંધિત કાયદાકીય ફેરફારો પર પણ કામ કરવામાં આવી રહ્યું છે. સરકારના જણાવ્યા અનુસાર આ પગલાથી ટોલ પેમેન્ટનું કામ ખૂબ જ ઝડપથી પૂર્ણ થશે અને વાહનોના જામમાંથી પણ છુટકારો મળશે. સાથે જ ટોલ બાબતે પણ પારદર્શિતા જાળવવામાં આવશે. એક સરકારી રિપોર્ટ અનુસાર FASTagને કારણે ટોલ પ્લાઝાની આસપાસના ટ્રાફિકમાં સુધારો થયો છે, પરંતુ ટોલ ગેટ પર ટ્રાફિકનું દબાણ યથાવત છે.
સરકારની યોજના શું છે
કેન્દ્રીય મંત્રી નીતિન ગડકરીએ ઈન્ડિયન એક્સપ્રેસ સાથેની વાતચીતમાં જણાવ્યું હતું કે વર્ષ 2019માં સરકારે કંપની દ્વારા ફીટ કરવામાં આવનાર નંબર પ્લેટને લઈને નિયમ જાહેર કર્યો હતો. જેના કારણે છેલ્લા 4 વર્ષમાં આવેલા તમામ વાહનોમાં કંપની દ્વારા નંબર પ્લેટ ફીટ કરવામાં આવી છે. હવે સરકાર ટોલ પ્લાઝાને હટાવવાની અને તેમની જગ્યાએ વિશેષ કેમેરા લગાવવાની યોજના ધરાવે છે, જે આ નંબર પ્લેટોની માહિતી લે છે અને આ વાહનો સાથે જોડાયેલા બેંક ખાતામાંથી ચાર્જ કાપી લે છે. આ અંગે એક પાયલોટ પ્રોજેક્ટ ચાલી રહ્યો છે અને ટૂંક સમયમાં તેને દેશભરમાં લાગુ કરવામાં આવી શકે છે.
શું સમસ્યા છે
કેન્દ્રીય મંત્રીએ માહિતી આપી છે કે આ યોજનાને લાગુ કરવામાં માત્ર એક જ સમસ્યા છે. વાસ્તવમાં હાલમાં કાયદામાં એવી કોઈ જોગવાઈ નથી કે જેમાં કેમેરા દ્વારા ટોલ ન ભરનારાઓને સજાની માહિતી આપવામાં આવી હોય. ગડકરીએ કહ્યું કે આ યોજના અમલમાં મૂકતા પહેલા આ કાયદાઓ લાવવા પડશે, આ ઉપરાંત આ જોગવાઈ પણ કરવી પડશે, જેથી આવી કાર કે જેમાં ખાસ નંબર પ્લેટ નથી, તે નિર્ધારિત સમયમાં તેને લગાવી શકે. આ બે પગલાં પછી કેમેરા દ્વારા ટોલ ચૂકવવાની યોજના લાગુ કરી શકાય છે.