વિશ્વની ધમકી છતાં, ભારત રશિયા પાસેથી વિપુલ પ્રમાણમાં તેલ ખરીદી રહ્યું છે, સાઉદી અરેબિયાને પાછળ છોડીને બીજો સૌથી મોટો સપ્લાયર બન્યો
રશિયા (Russia) ભારતનું બીજું સૌથી મોટું તેલ નિકાસકાર બની ગયું છે. હવે સાઉદી અરેબિયા (Saudi Arabia) ભારતમાં તેલની નિકાસના મામલે ત્રીજા સ્થાને પહોંચી ગયું છે. ઈરાક અત્યારે તેલની નિકાસમાં નંબર વન છે.
ભારત(India)નો જૂનો મિત્ર રશિયા (Russia) દેશનો બીજો સૌથી મોટો ઓઈલ સપ્લાયર બની ગયો છે. એક સમય હતો જ્યારે ભારત રશિયા પાસેથી માત્ર 1 ટકા તેલ આયાત કરતું હતું. હવે રશિયા સાઉદી અરેબિયા(Saudi Arabia)ને પાછળ છોડીને તેલ પુરવઠાના મામલે બીજા નંબર પર આવી ગયું છે. ભારત હાલમાં ઈરાક(Iraq)માંથી સૌથી વધુ તેલ આયાત કરે છે. વાસ્તવમાં રશિયા પ્રતિ બેરલ $30નું ડિસ્કાઉન્ટ આપી રહ્યું છે. ભારત આ ડિસ્કાઉન્ટનો ભરપૂર ફાયદો ઉઠાવી રહ્યું છે. યુક્રેન પર હુમલાના કારણે યુરોપ અને અમેરિકા જેવા દેશોએ રશિયા પર કડક પ્રતિબંધો લગાવ્યા છે. રશિયા તેલનો મુખ્ય ઉત્પાદક છે. આવી સ્થિતિમાં તે પોતાનું તેલ ડિસ્કાઉન્ટ પર વેચી રહ્યો છે. ભારતે આ તકનો લાભ ઉઠાવ્યો અને દુનિયાની પરવા કર્યા વિના પોતાના જૂના મિત્ર પાસેથી મોટા પ્રમાણમાં તેલની આયાત કરવાનું શરૂ કર્યું.
ઇન્ડસ્ટ્રી ડેટા દર્શાવે છે કે દેશની રિફાઇનિંગ કંપનીઓએ યુક્રેન યુદ્ધ પછી ભારે ડિસ્કાઉન્ટ પર ઉપલબ્ધ રશિયન ક્રૂડ ઓઇલ ખરીદવાનું શરૂ કર્યું છે. ભારતીય રિફાઇનિંગ કંપનીઓએ મે મહિનામાં લગભગ 25 મિલિયન બેરલ રશિયન ક્રૂડ ખરીદ્યું હતું. તે ભારતની કુલ ક્રૂડ ઓઈલની આયાતમાં 16 ટકા હિસ્સો ધરાવે છે.
એપ્રિલમાં પ્રથમ વખત હિસ્સો 5 ટકા પર પહોંચ્યો હતો
એપ્રિલમાં પ્રથમ વખત, ભારતના સમુદ્ર મારફતે કુલ ક્રૂડ ઓઈલની આયાતમાં રશિયાનો હિસ્સો પાંચ ટકા સુધી પહોંચ્યો હતો. ડેટા અનુસાર, તે ગયા વર્ષના પ્રથમ ત્રિમાસિક ગાળામાં એટલે કે 2021 અને 2022માં એક ટકાથી ઓછો હતો. ભારત વિશ્વનો ત્રીજો સૌથી મોટો ક્રૂડ ઓઈલ આયાતકાર અને ઉપભોક્તા દેશ છે. રશિયાના રાષ્ટ્રપતિ વ્લાદિમીર પુતિને યુક્રેન પર હુમલો કરવાનો આદેશ આપ્યા બાદ ભારતે લાંબા સમયથી રશિયા પાસેથી ક્રૂડ ખરીદવાના તેના વલણનો બચાવ કર્યો છે.
ભારત ઈરાક પાસેથી સૌથી વધુ તેલ ખરીદે છે
મે મહિનામાં ઇરાક ભારતનું ટોચનું સપ્લાયર રહ્યું હતું અને સાઉદી અરેબિયા હવે ત્રીજા નંબરનું સૌથી મોટું સપ્લાયર છે. વૈશ્વિક ઉર્જાના ભાવ વધી રહ્યા છે તેવા સમયે ભારતે રશિયા પાસેથી ક્રૂડ ઓઈલની આયાત વધારવા માટે મુક્તિનો લાભ લીધો છે. રશિયન તેલ પ્રતિ બેરલ $30 ના ડિસ્કાઉન્ટ પર ઉપલબ્ધ છે. અમેરિકા અને ચીન પછી ભારત વિશ્વમાં તેલનો ત્રીજો સૌથી મોટો વપરાશકાર છે. આંતરરાષ્ટ્રીય બજારમાં ક્રૂડ ઓઈલ અત્યારે 120 ડોલર પ્રતિ બેરલના સ્તરે છે.
રશિયા બીજા નંબરનું સૌથી મોટું સપ્લાયર બન્યું
GEPL કેપિટલના અહેવાલ મુજબ ભારતમાં તેલની માંગમાં તેજી આવી રહી છે. ભારતને 2020 માં દૈનિક ધોરણે 4.51 મિલિયન બેરલ તેલની જરૂર હતી, જે 2021 માં 5.54 ટકા વધીને 4.76 મિલિયન બેરલ થઈ ગઈ છે. વર્ષ 2021માં ભારતની વાર્ષિક તેલની માંગ 1737.4 મિલિયન બેરલ હતી. ભારત તેની જરૂરિયાતના 85 ટકા તેલની આયાત કરે છે. ભારત તેની તેલની જરૂરિયાતના 27 ટકા ઇરાકમાંથી, 17 ટકા સાઉદી અરેબિયામાંથી અને 13 ટકા યુએઈમાંથી આયાત કરે છે. જોકે હવે રશિયાએ સાઉદી અરેબિયાનું સ્થાન લીધું છે.